ដីត្រពាំងអង្គ ឬហៅថាទួលលោកតា គឺជាដីរួមភូមិទំហំ៤២៥៧ ម៉ែត្រការ៉េ ត្រូវគេឃុបខិតគ្នាជាប្រពន្ធ័លក់បានសម្រេចម្ដងហើយ ក្រោមរូបភាពស្នើសុំពីអ្នកភូមិលក់ទៅឱ្យឈ្មួញយកប្រាក់ចែកគ្នា ដោយមានមេខ្យល់ជាអ្នកអន្ទង និងបើកភ្លើងខៀវពីអាជ្ញាធរសង្កាត់គោករកា ក្នុងខណ្ឌព្រែកព្នៅ។
សេចក្ដីរាយការបានឱ្យដឹងថា ដើមឡើយដីត្រពាំងអង្គនេះជាដីរួមភូមិសម្រាប់គោរពបូជាតាមជំនឿងតាំងពីដូនតាមក ដោយនៅទីនោះមានទួលអង្គបុរាណមានស្រះទឹកព័ទ្ធជុំវិញ និងស្រះធំមួយនៅពីមុខទួលអង្គ ក្នុងទំហំដី៤២៥៧ ម៉ែត្រការ៉េ ដោយសព្វថ្ងៃបន្ទាប់ពីត្រូវរូវគ្នាគេបានចាក់ដីបំពេញសង់របងរួចរាល់ហើយ។
មុននឹងលក់បានសម្រេចដីខាងលើនេះក៏មានអ្នកភូមិ៦គ្រួសារ ក្នុងចំណោមអ្នកភូមិសរុប៩៥គ្រួសារដំបូងឡើយមិនយល់ព្រមចូលរួមលក់នោះទេ តែក្រោយមកមានការកោះប្រជុំពីអាជ្ញាធរសង្កាត់ក៏យល់ព្រម ដែលគេដឹងថាមានជាប់ពាក់ព័ន្ធជាមួយលោកចៅសង្កាត់ដែលជាឈ្មួញដីស្រាប់បានរៀបចំទុកលក់ឱ្យក្រុមខ្លួនដើម្បីបានប្រាក់ចំណេញ គ្រាដើមឡើយពលរដ្ឋមួយក្រុមអ្នករៀបចំដីនឹងលក់ដែរ តែមិនបានសម្រេចនោះទេ។
ក្រោយពីលក់បានប្រាក់ជាង ៨៥ម៉ឺនដុល្លារកាលនោះគេបែងចែកជា៣ចំណែក ទីមួយអាជ្ញាធរសង្កាត់យក៣០ដុល្លារក្នុងមួយម៉ែត្រការ៉េ ដោយលើកហេតុផលថា សេវារត់ការ ចំណែកទី២ លើក្រុមអ្នកតំណាងពលរដ្ឋជាង១០នាក់ យកកម្រៃជើងសារ២០ដុល្លារក្នុងមួយម៉ែត្រការ៉េ សល់ប៉ុន្មានសម្រាប់អ្នកភូមិចែកគ្នា។
ដោយឡែករយៈពេលប៉ុន្មានថ្ងៃក្នុងខែទី១ នៃឆ្នាំ២០២៣ គេធ្វើម្ដងទៀតគឺក្រុមលោកចៅសង្កាត់ដដែលពាក់ព័ន្ធក្នុងគម្រោងការលក់ដីរួមភូមិនៅត្រពាំងអង្គខាងលិចជាង ៤០អាបន្ថែមទៀត។ដោយលក់បានក្នុង១ម៉ែត្រការ៉េ តម្លៃជាង២០០ដុល្លារ។ ដែលដើមឡើយដីនេះលក់មិនបានទេព្រោះក្រុមអ្នកភូមិបដិសេធទៅនឹងការទាមទារបស់ពលរដ្ឋ៣គ្រួសារដែលចង់យកដីជាង៤០អានេះធ្វើជាកម្មសិទ្ធដោយលើកហេតុផលថា ខ្លួន៣គ្រួសារជាអ្នកគ្រប់គ្រងអាស្រ័យផលយូរមកហើយក៏កើតជារឿងប្ដឹងផ្ដល់គ្នាទៅតុលាការតែនៅមិនសះជាឡើយ។
ទាល់តែក្រុមលោកចៅសង្កាត់ប្រើក្បួនដូចកាលលក់លើកទី១ ពោលគឺចែកប្រយោជន៍គ្នាក្នុងភាពជាបុគ្គល មិនគិតរក្សាដីរួមត្រពាំងអង្គនោះជាសម្បត្តិសាធារណៈសម្រាប់ប្រើប្រាស់ជាប្រយោជន៍អ្នកភូមិយូរអង្វែងនោះទេ។ ព្រោះអ្នកពាក់ព័ន្ធទទួលបានប្រយោជន៍ពីការគប់គិតលក់នេះ។ ដោយ៣គ្រួសារដែលប៉ុនប៉ងយកដីនោះបាន៣០% សល់៧០% អាជ្ញាធរសង្កាត់ចែកឱ្យមេខ្យល់ឬហៅថាតំណាងពលរដ្ឋម្នាក់៣ពាន់ដុល្លារ នៅសល់ប៉ុន្មានគឺអាជ្ញាធរចាត់ចែងគ្នាជាមួយអ្នកភូមិ ដោយមានចៅរងទី៣ ឈ្មោះ ហៃ ជាអ្នកបោះមេ។ នោះមិនរាប់បញ្ជូលកម្រៃជើងសាររវាងអាជ្ញាធរសង្កាត់និងឈ្មួញដីផងទេ។
ទាក់ទងនឹងសកម្មភាពខាងលើលោក សន ស៊ិន ចៅសង្កាត់គោករកាបានឱ្យថា ដីខាងលើជារឿងប្រជាជន និងមានឯកសាររបស់គេ តែលោកមិនបញ្ជាក់ឱ្យច្បាស់លាស់ពីដំណើររឿងនោះទេគ្រាដែលក្រុមការងារ 1Post ព្យាយាមផ្ញើសារ និងខលទៅតាមបណ្ដាញ Telegram សាកសួរបន្ថែមតែលោកមិនលើកទទួល។
គូររំលឹកថា កន្លងទៅសម្ដេចតេជោ នាយករដ្ឋមន្ត្រីបានធ្លាប់មានប្រសាសន៍ក្រើនរំលឹកដល់អាជ្ញាធរទាំងអស់ឱ្យរក្សាដីរួមភូមិទុកកុំលក់ដូរ សម្រាប់ប្រើប្រាស់ជាប្រយោជន៍រួមយូរអង្វែងដោយប្រែដីទាំងនោះទៅកន្លែងហាត់ប្រាណ ឬទីលានកីឡាជាដើម។ យ៉ាងណាមិញដូចករណីនៅភូមិបែកបក សង្កាត់គោករកា ខណ្ឌព្រែកព្នៅខាងលើនេះ គឺអាជ្ញាធរមិនបានយកចិត្តទុកដាក់ការពារឱ្យស្របនឹងការលើកឡើងរបស់សម្ដេចនោះទេ បែជាខំប្រឹងប្រែងដើរតួរយ៉ាងសំខាន់ធ្វើឱ្យដីរួមភូមិធ្លាក់លើដៃឈ្មួញព្រោះតែផលប្រយោជន៍បុគ្គលជាធំ៕ តាពេជ្រ
