ភ្នំពេញ៖ មានករណីឃាតកម្មមួយបានកើតឡើង បណ្តាលឲ្យបុរសម្នាក់ដេកស្លាប់នៅក្បែរម៉ូតូរបស់ខ្លួន បន្ទាប់ពីត្រូវបានគេបាញ់ប្រហារ កាលពីវេលាម៉ោង ១:៣០នាទីថ្ងៃត្រង់ ថ្ងៃទី២ ខែវិច្ឆិកាឆ្នាំ២០២២ ស្ថិតនៅតាមបណ្ដោយផ្លូវ១០១១ កែងផ្លូវលេខ១៩៧៨ ស្ថិតក្នុងសង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ។
យោងតាមប្រភពព័ត៌មានបានឱ្យដឹងថា មុនពេលកើតហេតុ គេឃើញសមត្ថកិច្ចមួយក្រុមបានដេញបុរសរងគ្រោះដោយសង្ស័យជាមុខសញ្ញានៅលើដងផ្លូវក្បែរទីតាំងកើតហេតុ។
ភ្លាមៗនោះស្រាប់តែមានអ្នកស្រែកថាចោរៗ បុរសខាងលើក៏បានព្យាយាមជិះម៉ូតូ Scoopy ពណ៌ខ្មៅ ពាក់ផ្លាកលេខ ភ្នំពេញ 1JG-4729 រត់គេចចូលទៅបណ្ដោយផ្លូវ១០១១ រួចក៏ត្រឡប់ក្រោយវិញស្រាប់តែលេចមុខបុរសម្នាក់ទៀតដែលកំពុងបើកបររថយន្តស៊េរីទំនើប Lexus ៥៧០ ពណ៌ខ្មៅបានចុះពីលើរថយន្តហើយដកកាំភ្លើងបាញ់ពីក្រោយបុរសម្នាក់នោះបណ្ដាលឱ្យដួលម៉ូតូផ្កាប់មុខស្លាប់នៅនឹងកន្លែង។ ចំណែកជនបង្កក៏បើករថយន្តគេចចេញពីកន្លែងកើតហេតុយ៉ាងលឿនបាត់ស្រមោល គ្រាដែលសមត្ថកិច្ចកំពុងធ្វើការស្រាវជ្រាវស្វែងរកជនសង្ស័យខ្មាន់កាំភ្លើង៕ រំចង់
