ពលរដ្ឋរាយការណ៍មកថា មិនជារឿងថ្មីទេសម្រាប់សកម្មភាពក្រុមរថយន្តយីឌុបខ្នាតយក្សដឹកអុសសាទែ ដោយផ្ទុកលើសទ្រុងរាប់ម៉ែត្រ តែអាចដឹកឆ្លងកាត់មុខក្រុមនគរបាលចរាចរណ៍ដែលឈរជើងចាំអនុវត្តន៍ច្បាប់នៅលើផ្លូវជាតិលេខ៦ ដែលនៅមិនឆ្ងាយប៉ុន្មានពីអធិការដ្ឋាននគរបាលស្រុកបាធាយ និងអាចបើកឆ្លងកាត់ស្ថានីយ៍ជញ្ជីងថ្លឹងទម្ងន់ថ្នល់កែងកំពង់ចាម បានយ៉ាងរលូន ដោយគ្រាន់តែឃើញប្រូរថយន្តចុះពីរថយន្តដើរទៅកាន់បន្ទប់របស់មន្ត្រីជញ្ជីង។ ដែលនាំឱ្យមានការកើតឆ្ងល់ថា ការដឹកបែបនេះមិនល្មើសច្បាប់ឬយ៉ាងណា? វីដេអូ https://fb.watch/eEczeFM3Bq/
ជាក់ស្ដែងដូចរូបភាពដែលកំពុងបង្ហាញនេះគឺក្រុមការងារ 1Post ថតបាននៅល្ងាចថ្ងៃទី២៨ កក្កដាឆ្នាំ២០២២ នៅចំណុចកន្លែងនគរបាលចរាចរណ៍ស្រុកបាធាយឈរជើងចាំអនុវត្តន៍ច្បាប់ និងស្ថានីយ៍ជញ្ជីងថ្លឹងទម្ងន់ថ្នល់កែងកំពង់ចាម។
ទាក់ទងសកម្មភាពនេះលោក សំ ណាល់ អធិការនគរបាលស្រុកបាធាយ បានឱ្យដឹងថា មូលហេតុដែលមន្រ្តីនគរបាលចរាចរណ៍ ដែលឈរជេីងនៅក្នុងស្រុកបាធាយ មិនបានហៅឃាត់រថយន្ដខាងលេីនេះ ដោយសារតែជាបទល្មេីស ដែលគោលដៅស្រុកព្រៃឈរបានធ្វេីការអប់រំ និងចេញបង្កាន់ដៃពិន័យរួចហេីយ។ ប៉ុន្តែក្នុងខ្លឹមសារនោះលោកនិយាយរៀបរាប់ពីរថយន្តផ្សេងដែលគោលដៅព្រៃឈរធ្វើការផាកពិន័យនៅវេលាម៉ោង៨:៣០នាទីព្រឹក ថ្ងៃទី២៨ ខែកក្កដា ឆ្នាំ២០២២ ម៉ាកហុីយ៉ាន់ដាយ ពាក់ស្លាកលេខភ្នំពេញ 3D-7392 ផ្ទុយពីរូបភាពដែល 1Post ថតបានគឺនៅវេលាម៉ោង១៦:៤៥នាទីល្ងាចថ្ងៃទី២៨ កក្កដា ឆ្នាំ២០២២ ដែលរថយន្តទាំងនោះមានស្លាកលេខកំពង់ចាម 3A-2867 ភ្នំពេញ 3C-8316 ភ្នំពេញ 3A-2910 និងកំពង់ចាម 3A-0405។
ចំណែកលោក ឯម កុសល ស្នងការនគរបាលខេត្តកំពង់ចាម មិនទាន់មានការបញ្ជាក់នៅឡើយបន្ទាប់ពីទទួលបានសារសំណួរ និងរូបភាពពី 1Post តាមលេខទូរសព្ទដៃ និងតាមតេឡេក្រាមរបស់លោកកាលពីថ្ងៃទី២៩ កក្កដា ឆ្នាំ២០២២ ដោយតែចូលមើលតែមិនតប។
លោក អ៊ុន ចាន់ដា អភិបាលខេត្តកំពង់ចាម ក៏មិនមានការឆ្លើយតបដែរបន្ទាប់ពីទទួលបានសារសំណួរពី 1Post កាលពីព្រឹកថ្ងៃទី៣០ កក្កដា ឆ្នាំ២០២២។
ដោយឡែកប្រធានមន្ទីរសាធារណៈការ និងដឹកជញ្ជូន ខេត្តកំពង់ចាម លោក សុខ លឹមហៀង1Post មិនទាន់អាចទំនាក់ទំនងសុំការបញ្ជាក់បាននៅឡើយ។
ទោះយ៉ាងនេះក្ដីពលរដ្ឋកើតឆ្ងល់នៅតែចង់ដឹងថា ហេតុអ្វីក្រុមរថយន្តយីឌុបខ្នាតយក្សដឹកអុសសាទែផ្ទុកលើសទ្រុងរាប់ម៉ែត្រ តែអាចដឹកឆ្លងកាត់មុខក្រុមនគរបាលចរាចរណ៍ដែលឈរជើងចាំអនុវត្តន៍ច្បាប់ និងស្ថានីយ៍ជញ្ជីងថ្លឹងទម្ងន់ថ្នល់កែងកំពង់ចាម បានយ៉ាងរលូនបែបនេះទៅវិញពិសេសក្រុមរថយន្តដែលមានឡូហ្គោ DN៕
