ការចាក់បំពេញដីជាច្រើនហិកតាទាំងនោះមាននៅភូមិកែវឧត្ដម ឃុំត្រពាំងគង ជាប់បណ្ដោយផ្លូវជាតិលេខ ០៤ និងមួយទីតាំងទៀតនៅជាប់បណ្ដោយផ្លូវកៅស៊ូលេខ ១៣០ ស្ថិតនៅភូមិរវៀង ឃុំរលាំងគ្រើល ស្រុកសំរោងទង ខេត្តកឱពង់ស្ពឺ ដែលពុំទាន់មានច្បាប់ត្រឹមត្រូវនៅឡើយ តែធ្វើសកម្មភាពជាមុនគ្រោងនឹងសម្រេចផែនការទៅហើយ។ នេះមិនទាន់រាប់បញ្ចូលទីតាំងចាក់បំពេញខ្នាតល្មមៗជាច្រើនទៀតដែលពុំមានច្បាប់។
ប្រភពដំណឹងបានឱ្យដឹងថា ការដ្ឋានខ្នាតធំស្ថិតនៅភូមិរវៀង នេះគឺការជីកអាចម៌ដី និងដឹកជញ្ជូនមិនគោរពបទដ្ឋានបច្ចេកទេសច្បាប់ផងទៀត ដោយផ្ទុកលើសទ្រុងមិនគ្របធ្លាក់លើផ្លូវកើតជង្ហុកជាទួលដូចអំបែងនំក្រក់ បង្កជាធូលីហ៊ុយ ពេលចាក់ទឹកជោគជាំកើតជាជ្រាំ ដីស្អិត រអិល នាំឱ្យពិបាកធ្វើដំណើរ និងរំខានដល់ជីវភាពប្រជាពលរដ្ឋ។
ទាក់ទងសកម្មភាពនេះលោក សួង សុភ័ន្ត ហៅសុខលាប ឈ្មួញអ្នកម៉ៅការបានឱ្យ 1Post ដឹងថា ច្បាប់មានហើយចាក់ដីប៉ុណ្ណាណីមេចអត់ច្បាប់ ក្រោយមកលោកប្រែថា ច្បាប់នោះចូលទៅដល់ស្រុក និងច្រកចេញចូលតែមួយ តែពុំទាន់បានត្រឡប់មកវិញ ហើយលោកសុំគេចាក់មុនលើទំហំដី ៨ហិកតា ចំពោះការមិនគោរពបទដ្ឋានបច្ចេកទេសនៃការដឹកជញ្ជូនលោកមិនបញ្ជាក់នោះទេ។ សម្លេង
បើតាមច្បាប់ និងសេចក្ដីជូនដំណឹងរបស់រដ្ឋបាលខេត្តកំពង់ស្ពឺ បានឱ្យដឹងថា ត្រូវមានច្បាប់ជាមុនសិនទើបអនុញ្ញាតឱ្យចាក់បំពេញដី ចំពោះដីទំហំចាប់ពី១ហិកតាឡើងត្រូវតែស្នើសុំការអនុញ្ញាតច្បាប់ពីថ្នាក់ខេត្ត ១ហិកតាចុះក្រោមស្នើសុំត្រឹមថ្នាក់ស្រុក ឬ ក្រុង ។ សម្លេង
ចំណែកការដ្ឋានធំមួយទៀតនៅភូមិកែវឧត្ដម ឃុំត្រពាំងគង ជាប់បណ្ដោយផ្លូវជាតិលេខ ០៤ ក៏មិនទាន់មានច្បាប់កែប្រប្រភេទដីឱ្យបានត្រឹមត្រូវក្នុងដៃផង តែធ្វើសកម្មចាក់បំពេញបានជាច្រើនហិកតាទៅហើយ ដោយល្បីមកថា អ្នករត់ការច្បាប់នោះជាអភិបាលរងស្រុកមួយរូបយកកញ្ចប់ប្រាក់ពីថៅកែមករត់ច្បាប់តែពុំទាន់បានសម្រេច។
ចំពោះការចាក់បំពេញដីឱ្យថៅកែនៅភូមិកែវឧត្ដម ខាងលើនេះដែរលោក មុត ភន អភិបាលស្រុកសំរោងទង មិនទាន់មានការបញ្ជាក់នៅឡើយទេ ក្រោយទទួលសារសំណួរពីក្រុមការងារ 1Post រួចហើយ។ លោកបានត្រឹមតបថា អរគុណ។
គួររម្លឹកថា ការប្រមូលធនធានរ៉ែដី និងការចាក់បំពេញដីជាច្រើនកន្លែងនៅខេត្តកំពង់ស្ពឺ ត្រូវបានគេមើលឃើញហាក់ដូចជាអនាធិបតេយ្យ គ្មានសណ្ដាប់ធ្នាប់ ដោយឈ្មួញហ៊ានធ្វើទាំងបំពានច្បាប់ លើការជីកកកាយ ការដឹកជញ្ជូន និងការកែប្រែប្រភេទដីមិនគោរពច្បាប់ឱ្យបានត្រឹមត្រូវនោះទេ ក្រោយពីពួកគេចាត់ចែងសែនអ្នកតាធំជាម្ចាស់ទឹកម្ចាស់ដី តាមក្បួនអ្នករៀបចំពិធីរួចហើយនោះ ដែលជំនឿផ្លូវក្នុងនេះត្រូវបានពួកគេប្រារព្វឡើងខ្លាចអ្នកតាកាច់ជាចម្បង៕
