ស្នងការដ្ឋាននគរបាលខេត្តសៀមរាប កាលថ្ងៃទី១៥ ខែមីនា ឆ្នាំ២០២២ បានបំពាក់បំពង់ពន្លត់អគ្គិភ័យសម្រាប់សង្គ្រោះបឋម នៅតាមម៉ូតូចល័តរបស់មន្ត្រីនគរបាល ដើម្បីអាចជួយសង្គ្រោះបឋមបានទាន់ពេលវេលា ក្នុងករណីគ្រោះថ្នាក់ចរាចរណ៍ ដែលរថយន្តបុកគ្នាបណ្តាលឱ្យមានអគ្គិភ័យកើតឡើង។
ការបំពាក់ជាជំហានដំបូងនេះ បានបំពាក់លើម៉ូតូចំនួន៧ ដោយក្នុងមួយម៉ូតូមានបំពង់ពន្លត់អគ្គិភ័យចំនួន២បំពង់ ខណៈពេលខាងមុខ គ្រោងបំពាក់ទៅលើម៉ូតូឱ្យបានច្រើនបន្ថែមទៀត។
សូមបញ្ជាក់ថា នេះអាចជាលើកដំបូងហើយដែលនគរបាលចរាចរណ៍ផ្លូវគោកបានបំពាក់បំពង់ពន្លត់អគ្គិភ័យនៅតាមម៉ូតូ ដើម្បីជួយសង្គ្រោះករណីបង្ការបើមានអគ្គិភ័យកើតឡើងដោយសារគ្រោះថ្នាក់ចរាចរណ៍៕
