ការសាងសង់ និងជួសជុលហេដ្ឋារចនាសម្ព័ន្ធផ្លូវចំនួន ៣៨ខ្សែ នៅក្រុងសៀមរាប បានបញ្ចប់ជាស្ថាពរតាំងពីថ្ងៃទី២៩ ខែធ្នូឆ្នាំ២០២១ ខណៈសាធារណៈជនកំពុងប្រើប្រាស់គ្រោងនឹងសម្ភោធជាផ្លូវរដ្ឋនៅពេលខាងមុខនេះ។
បើតាមក្រសួងសាធារណៈការបានបង្ហើបឱ្យដឹងថា គម្រោងកែលម្អហេដ្ឋារចនាសម្ព័ន្ធផ្លូវក្នុងក្រុងសៀមរាប ចំនួន៣៨ខ្សែនេះ មានប្រវែងសរុប ១០៦,៤២ គីឡូម៉ែត្រ ប្រើប្រាស់ថវិកាជាតិសរុបប្រមាណជាង ១៤៩.២១៦.៥៩៥ ដុល្លារអាមេរិក។ ក្នុងនោះថវិកា ៩លានដុល្លារ ត្រូវបានចំណាយលើការងារចាំបាច់ក្នុងការរៀបចំ ស្ថាបនាប្រព័ន្ធបង្ហូរទឹកភ្លៀង និងទឹកកខ្វក់។
សូមរម្លឹកថា គម្រោងសាងសង់ផ្លូវចំនួន ៣៨ខ្សែ ជាគោលដៅមួយប្រែក្លាយក្រុងសៀមរាបឱ្យប្រែក្លាយជាទីក្រុងដ៏ទំនើប វៃឆ្លាត ពោរពេញទៅដោយសោភ័ណភាព បរិស្ថានល្អ សម្រាប់ការរស់នៅឱ្យស័ក្តិសមជាទីក្រុងទេសចរណ៍ វប្បធម៌ ប្រវត្តិសាស្ត្រ និងជាការទាក់ទាញភ្ញៀវទេសចរឱ្យមកកម្សាន្តកាន់តែច្រើន ទន្ទឹមនឹងនោះពលរដ្ឋខ្លួនឯងក៏ត្រូវចូលរួមថែរក្សាសណ្ដាប់ធ្នាប់ អនាម័យ និងបរិស្ថានឱ្យបានល្អប្រសើរផងដែរ ដើម្បីសម្រេចនូវគោលបំណងខាងលើឱ្យមាននិរន្តរ៍ភាព៕
