ក្រោតសមត្ថកិច្ចធ្វើប្រតិបត្តិការនៅចំណុចសណ្ឋាគារ ជូហេតាង ស្ថិតក្នុងក្រុមទី១៥ ភូមិ៣ សង្កាត់លេខ១ ក្រុងព្រះសីហនុ បានឃាត់ខ្លួនជនសង្ស័យម្នាក់ កាលពីថ្ងៃទី១០ ឧសភា ឆ្នាំ២០២៤។
ប្រភពដំណឹងបានឱ្យដឹងថា ការចុះបង្គ្រាបកាន់កាប់អាវុធខុសច្បាប់ និងការជួញដូរថ្នាំញៀន បន្ទាប់ពីទទួលបានបណ្តឹងពីឈ្មោះ វិត សុភ័ក្រ្ត ភេទប្រុស ជនជាតិខ្មែរ ជាម្ចាស់រថយន្តម៉ាក Prius ពណ៌ស ឆ្នាំ២០១៣ ដែលពាក់ស្លាកលេខភ្នំពេញ 2BV-3114 បានជួលទៅឱ្យឈ្មោះ តុន ទូត ភេទប្រុស ជនជាតិខ្មែរ តាមកិច្ចសន្យាជួលរថយន្ត ហើយឈ្មោះ តុន ទូត ភេទប្រុស ជនជាតិខ្មែរ បានឈប់បង់ប្រាក់ឈ្នួលជាច្រើនថ្ងៃមកហើយ។
ដោយបានយករថយន្តខាងលើនេះ ចតទុកចោលនៅក្បែរកាស៊ីណូ ជិនប៉ី៣ ស្ថិតនៅភូមិ៣ សង្កាត់លេខ៤ ក្រុងព្រះសីហនុ ហេតុដូច្នេះហើយឈ្មោះ វិត សុភ័ក្រ្ត បានធ្វើការតាមដានតាម GPS ក៏បានទៅយករថយន្តមកដាក់នៅយានដ្ឋាន ស៊ីធី ៦៨ (CT 68) លុះពេលមកដល់ខ្លួនក៏បានបើកគូថរថយន្តខាងលើ បានឃើញមានវ៉ាលី១ ដោយក្នុងនោះមានអាវុធ និងគ្រាប់មួយចំនួន ដូចនេះហើយម្ចាស់រថយន្តបានធ្វើការរាយការណ៍ និងដាក់ពាក្យបណ្ដឹងទៅកម្លាំងសមត្ថកិច្ចឱ្យចុះមកត្រួតពិនិត្យ និងឆែកឆេរតាមនីតិវិធីច្បាប់។
ក្រោយឆែកវ៉ាលី១ពណ៌ខ្មៅឃើញមាន អាវុធចំនួន ៧ដើម។ ហើយក៏ធ្វើការត្រួតពិនិត្យបន្តទៀតឈានដល់ការឃាត់ខ្លួនជនសង្ស័យម្នាក់ ជនជាតិចិន ឈ្មោះ PENG XIONGFENG ភេទប្រុស អាយុ ៣៣ឆ្នាំ មុខរបរ មិនពិតប្រាកដ ស្នាក់នៅក្រុមទី១៥ ភូមិ៣ សង្កា ត់លេខ១ ក្រុងព្រះសីហនុ និងបានដកហូតសារធាតុញៀន ៥៨គីឡូ ១៤២,៣០ក្រាម មានប្រភេទមេតំហ្វេតាមីន , សារធាតុញៀនប្រភេទកេតាមីន (K) , សារធាតុញៀនប្រភេទអ៉ិចស្ដាស៊ី , និងឧបករណ៍ផលិតកែច្នៃ រួមទាំងថង់វេចខ្ចប់គ្រឿងញៀនមួយចំនួនធំ និងកាំភ្លើងខ្លីចំនួន ១ដើម ម៉ាក BERETTA-MCO 950 B-CAL635៕
