វិឡា និងអាគារដ៏ស្កឹមស្កៃមិនតិចជាង៤ខ្នងកំពុងសាងសង់លើដីចំណីសមុទ្រអង្កោល ស្ថិតនៅស្រុកដំណាក់ចង្អើ ខេត្តកែប ដែលមើលទៅហាក់មានសំណាងជាងពលរដ្ឋដទៃ ព្រោះទីតាំងឆ្នេរខ្សាច់អង្គោលលាតសន្ធឹងរាប់រយម៉ែត្រគ្មានសំណង់រឹងមាំណាមកបាំងជិតបែបនេះទេ ទោះកន្លែងនោះពុំមានខ្សាច់ ដែលផ្ទុយពីអនុក្រិតរបស់រាជរដ្ឋាភិបាលបានកំណត់ចំណីឆ្នេរ ឬ ពាមសមុទ្រ ត្រូវទុកប្រវែង ១០០ម៉ែត្រ ចុះក្រឡេកមកសកម្មភាពនេះវិញ។ វីដេអូ https://fb.watch/j3MDUTh68c/
ការសង់សំណង់ខាងលើធ្វើឡើងតាំងពីជំនាន់លោកស្រីអភិបាលស្រុកអាណត្តិមុន ហើយក៏ត្រូវបានផ្អាកព្រោះតែគ្មានច្បាប់ត្រឹមត្រូវ តែក្រោយមកទៀតម្ចាស់សំណង់នៅតែហ៊ានធ្វើបន្តរហូតមកដល់អាណត្តិអភិបាលថ្មីនេះ។
ទាក់ទងសកម្មភាពសាងសង់នេះលោក ឆាង ឆៃ អភិបាលស្រុកដំណាក់ចង្អើបានឱ្យ 1Post ដឹងថាការសង់នេះស្ថិតលើដីកម្មសិទ្ធ មិនស្ថិតលើដីឆ្នេរទេ។ ហើយម្ចាស់សំណង់កំពុងសុំច្បាប់សាងសង់សុំកែប្លង់ចូលទៅមន្ទីរដែនដីហើយ។ ដែលសកម្មភាពនេះនាំឱ្យគេកើតឆ្ងល់ថា ហេតុអ្វីសំណង់អាចធ្វើទៅបាន ទាំងមិនទាន់មានច្បាប់អនុញ្ញាតិគ្រប់គ្រាន់ក្នុងដៃនៅឡើយ។
បើតាមប្រភពដែល 1Post ទទួលបានដីនេះដើមឡើយជាបន្ទាយសមត្ថកិច្ចជើងទឹក ហើយបានលក់បន្តបន្ទាប់ធ្លាក់មកដល់លោក កែវ បេងវឌ្ឍន៍ ប្រតិភូរដ្ឋាភិបាលទទួលបន្ទុកអគ្គនាយក នៃអគ្គនាយកដ្ឋានហិរញ្ញវត្ថុថ្នាក់ក្រោមជាតិ ក្រោយមកទៀតមានអ្នកមកអះអាងថា ដោយសារដីនេះមានបញ្ហាលោក បេងឌ្ឍ ន៍ក៏បានលក់បន្តឱ្យទៅលោក ហួត ហាក់ ដែលជាម្ចាស់សំណង់នេះ។
ទាក់ទងនឹងលោក ហួត ហាក់ ម្ចាស់សំណង់ខាងលើ 1Post មិនទាន់អាចទំនាក់ទំនងសុំការបញ្ជាក់បាននៅឡើយ។
សូមរំលឹកថា តាមអនុក្រឹតលេខ ៩៨ អនប្របក ចុះហត្ថលេខាដោយសម្ដេចតេជោ ហ៊ុន សែននាយករដ្ឋមន្ត្រីកម្ពុជា ត្រង់មាត្រា៨ បានកំណត់ថា ឆ្នេរ និងពាមសមុទ្រ ត្រូវទុកចម្ងាយ ១០០ម៉ែត្រ(ពេលទឹកជោរអតិបរមា) ដោយគិតពីមាត់ឆ្នេរ និងមាត់ពាមសមុទ្រ ហើយប្រសិនបើមានផ្លូវសាធារណៈស្របឆ្នេរស្រាប់ក៏គិតត្រឹមផ្លូវនោះ។ ចុះក្រឡេកមកមើលទីតាំងនេះវិញ ហេតុអ្វីគេអាចសង់សំណង់រឹងមាំថ្មីៗបាន។ នេះជាព័ត៌មានបឋម 1Post កំពុងព្យាយាមសាកសួរអ្នកពាក់ព័ន្ធបន្ថែមទៀត ដើម្បីលម្អិតរឿងនេះ៕ តាពេជ្រ
