ភ្នំពេញ៖ សម្ដេចតេជោលើកឡើងថា លោក វេង សាខុន មិនបានបង្កបញ្ហាធ្ងន់ធ្ងរនោះឡើយគ្រាន់តែអ្វីដែលសម្តេចចង់បានតែមិនបាន។
ការលើកឡើងបែបនេះនៅក្នុងពិធីចែកសញ្ញាបត្រសញ្ញាបត្រដល់និស្សិតសាកលវិទ្យាល័យភ្នំពេញអន្តរជាតិ (PPIU) កាលពីថ្ងៃទី១១ តុលា ឆ្នាំ២០២២។ ដោយប្រមុខរដ្ឋាភិបាលក៏បានចាត់ទុកលោក វេង សាខុន ជាមន្ត្រីល្អម្នាក់របស់ខ្លួនផងដែរ។
នៅក្នុងនោះសម្តេចនាយករដ្ឋមន្ត្រី ហ៊ុន សែន ក៏បានសរសេរលិខិតថ្វាយព្រះករុណាព្រះមហាក្សត្រ ដើម្បីតែងតាំងលោក វេង សាខុន អតីតរដ្ឋមន្ត្រីកសិកម្ម រុក្ខាប្រមាញ់ និងនេសាទជារដ្ឋមន្ត្រីប្រតិភូអមនាយករដ្ឋមន្ត្រី។
សូមរម្លឹកថា កាលពីថ្ងៃទី០៨ ខែតុលា ឆ្នាំ២០២២ សម្តេចព្រះបាទ ព្រះបរមនាថ នរោត្តម សីហមុនី ព្រះមហាក្សត្រនៃកម្ពុជា បានចេញព្រះរាជក្រឹត្យបញ្ចប់មុខដំណែងលោក វេង សាខុន ពីរដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ។ នៅថ្ងៃដដែលនោះដែរ សម្ដេចតេជោសែន នាយករដ្ឋមន្ត្រីក៍បានចេញសេចក្ដីសម្រេចចាត់តាំងលោក អូន ព័ន្ធមុន្នីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួង សេដ្ឋកិច្ច និងហិរញ្ញវត្ថុ ជារដ្ឋមន្ត្រីស្ដីទី ក្រសួងកសិកម្ម រុក្ខាប្រម៉ាញ់ និងនេសាទ បន្ថែមលេីមុខងារបច្ចុប្បន្នរហូតដល់មានការតែងតាំងជាផ្លូវការណាមួយផ្សេងទៀត។
ហើយនៅថ្ងៃទី០៨ ខែតុលា ឆ្នាំ២០២២ នោះដែរលោក ឌិត ទីណា ត្រូវបានរាជរដ្ឋាភិបាលកម្ពុជាស្នើរដ្ឋសភាជាតិ ដើម្បីបោះឆ្នោតផ្តល់សេចក្តីទុកចិត្តធ្វើជារដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ ជំនួស លោក វេង សាខុន ដែលត្រូវបានបញ្ចប់តំណែង។ លោក ឌិត ទីណា បច្ចុប្បន្នជារដ្ឋលេខាធិការក្រសួងរ៉ែ និងថាមពល គឺជាកូនប្រុសរបស់លោក ឌិត មន្ទីរ កំពុងកាន់ដំណែងប្រធានតុលាការកំពូល៕ តាពេជ្រ
