ការទម្លាក់សក់ផ្តល់នូវអត្ថប្រយោជន៍ជួយលើកសម្រស់ទៅម៉ូដដែលស្ត្រីម្នាក់ៗចូលចិត្តគ្រាដែលស្ត្រីមួយចំនួនបានងាកមកជ្រើសរើសការចងសក់ជំនួសវិញ ព្រោះតែវាបង្កផលរំខានផ្សេងៗដូចជាបាំងភ្នែក ចូលមាត់ពេលទទួលទានអាហារ និងស្អុះស្អាប់ពេលស្ថិតនៅក្នុងបរិយាកាសក្តៅជាដើម។ប៉ុន្តែសកម្មភាពបែបនេះរាល់ថ្ងៃនឹងបង្កផលប៉ះពាល់ដល់សុខភាពដោយមិនដឹងខ្លួន។ ដើម្បីរក្សាសក់ឲ្យមានសុខភាពល្អ និងនៅតែស្រស់ស្អាតមានកត្តាមួយចំនួនគួរគប្បីជៀសវាងដូចខាងក្រោម៖
សក់ជ្រុះដែលបង្កមកពីការចងកៅស៊ូរឹតបន្តឹងខ្លាំងដូចដែលឃើញជាក់ស្តែងរាល់ពេលស្រាយកៅស៊ូចេញ យ៉ាងហោចណាស់ក៏មានសក់ចាប់ពី ៣ ទៅ ៥សរសៃដែរដែលជាប់ជំពាក់នៅនឹងកៅស៊ូ ហើយនេះក៏ជាករណីបង្កឲ្យដាច់សក់នៅពេលទាញកៅស៊ូចេញពីសក់ផងដែរ។ លើសពីនេះ ការចងសក់ញឹកញាប់ និងរឹតបន្តឹងខ្លាំងពេកអាចបណ្តាលឲ្យសក់បាក់ភ្លី ជាប់ផ្នត់ មិនរលាស់ត្រង់ដូចមុន។
បើយើងការពារប្រសើរជាងព្យាបាល ប្រសិនបើមិត្តៗនារីមិនចង់បង្កហានិភ័យដល់សក់របស់ខ្លួនគួរជៀសវាងធ្វើនូវចំណុចទាំងនេះ៖
កៅស៊ូ និងដង្កៀបគឺជាអាវុធចម្បងនៃការធ្វើឲ្យដាច់សក់ និងជ្រុះ ដូចនេះអ្នកគួរជំនួសប្រើរបស់ទាំងពីរនេះ ដោយងាកមកប្រើក្រណាត់ឬខ្សែចងបែបយឺតៗវិញទើបប្រសើរ។
ការចងសក់រឹតតឹងខ្លាំងអាចធ្វើឲ្យសក់ជ្រុះ ពិសេសបំផុតសម្រាប់អ្នកមានសក់ស្ងួត សក់ខូចសក់សំពោង និងបែកចុងជាដើម។
នៅពេលសក់សើម ស្ថានភាពសក់នឹងមានសភាពខ្សោយបំផុត ដែលនៅពេលចងជាមួយកៅស៊ូ វានឹងធ្វើឲ្យដាច់ ឬជំពាក់ជាប់កៅស៊ូនៅពេលស្រាយចេញវិញ។
ការជៀសវាងការចងសក់លើកឡើងលើម៉ូដដដែលៗ ដោយងាកមកចងសក់បែបស្រាលៗវិញដូចជា ចងត្រឹមកញ្ចឹងក ចងទម្លាក់ទៅចំហៀង ឬក្រងបែបធូរៗជាដើម។
ដើម្បីរក្សាសក់ឲ្យនៅតែស្រស់ស្អាត និងមានសុខភាពល្អ។ ក្រៅពីការរៀបរាប់នៅខាងលើអាចសបញ្ជាក់ឲ្យឃើញថា ការទម្លាក់សក់គឺប្រសើរជាងការចងសក់ ដូចនេះគួរទម្លាក់សក់ឲ្យបានច្រើនជាងការចងសក់ទើបប្រសើរ ពិសេសទម្លាក់នៅពេលចូលគេង ហើយប្រសិនបើដាច់ខាតទម្លាក់សក់មិនបានគួរប្រើប្រេងលាបសក់មុនពេលចងសក់ដើម្បីកុំឲ្យកៅស៊ូជំពាក់៕
