ទំនប់អាងស្តុកទឹក"រក្សា"ស្ថិតនៅលើដងស្ទឹងសែន ក្នុងព្រំប្រទល់ឃុំពុទ្រា និងឃុំរក្សា ស្រុកជ័យសែន និងស្រុករវៀង ខេត្តព្រះវិហារ បានសាងសង់ចាប់តាំងពីដេីមខែវិច្ឆិកា ឆ្នាំ២០១៩ ដែលបានបញ្ចប់រួចរាល់ជាស្ថាពរចុងខែកក្កដា ឆ្នាំ២០២២។ នេះបើតាមការឱ្យដឹងពីក្រសួងធនធានទឹកនិងឧតុនិយម កាលពីរាត្រីថ្ងៃទី១០ សីហា ឆ្នាំ២០២២។
ទំនប់អាងស្តុកទឹក"រក្សា"នេះ មានប្រវែងសរុប ២.៩៥៦ម៉ែត្រ អាចស្តុកទឹកបានប្រមាណ ២៥៧លានម៉ែត្រគូប ដោយមានទ្វារទឹកធំចំនួន ២០ទ្វារ (ទ្វារទឹកនីមួយៗមានទំហំ១០ម៉ែត្រ និងទម្ងន់ប្រមាណជាង ៦០តោន) ព្រមទាំងមានបម្រុងទុកនូវទ្វារទឹក និងបំពង់សម្រាប់តួប៊ីនចំនួន ០៣កន្លែង ដែលអាចផលិតថាមពលវារីអគ្គិសនីបាន ១,៥០មេហ្គាវ៉ាត់។
សូមបញ្ជាក់ថា ទំនប់អាងស្តុកទឹកនេះ មានលទ្ធភាពផ្គត់ផ្គង់ទឹកស្រោចស្រពសម្រាប់ដំណាំកសិកម្មរបស់ប្រជាកសិករនៅរដូវវស្សាបានចំនួន ១៤៣.៣២៣ ហិកតា និងនៅរដូវប្រាំងបានចំនួន ២២.៨៧៨ហិកតា ព្រមទាំងជាប្រភពដ៏សំខាន់សម្រាប់ផ្គត់ផ្គង់ទឹកស្អាត និងជួយកាត់បន្ថយទឹកជំនន់និងគ្រោះរាំងស្ងួតតាមរយ:យន្តការបច្ចេកទេសច្បាស់លាស់នៃការគ្រប់គ្រងធនធានទឹកចម្រុះរបស់ស្ទឹងសែនដែលគ្របដណ្តប់ភាគច្រើនលើទឹកដីនៃខេត្តព្រះវិហារ និងខេត្តកំពង់ធំផងដែរ៕ 1post
