ឈើជ្រុង៦៨កំណាត់ ត្រូវបានរុករកឃើញលាក់នៅក្នុងព្រៃដោយកម្លាំងមូលដ្ឋានកងរាជអាវុធហត្ថស្រុកឱរ៉ាល់ កាលពីថ្ងៃទី៣០ ខែមេសា ឆ្នាំ២០២១។
តាមផេកកងរាជអាវុធហត្ថខេត្តកំពង់ស្ពឺ បានឱ្យដឹងថា កម្លាំងអាវុធហត្ថស្រុកកឱរ៉ាល់ ចេញប្រតិបត្តិការរុករកតាមតំបន់ព្រៃក៏ប្រទះឃើញឈើប្រភេទចម្រុះមាន ឈ្លីច ម្រេញ ត្រសេក សុក្រំចំនួន៦៨កំណាត់មិនទាន់វាស់វែង(គ្មានម្ចាស់)លាក់ទុកនៅចំនុចប៉ុយរ៉ុយ ក្នុងព្រៃដីឡតិ៍ភូមិសំរោង ឃុំត្រពាំងជោ ស្រុកឱរ៉ាល់ ខេត្តកំពង់ស្ពឺ។
ក្រោយបង្ក្រាបនៅមិនទាន់វាស់វែងទេ ដោយបានប្រគល់ឱ្យទៅមន្ត្រីជំនាញបរិស្ថាន នៃការិយាល័យដែនជម្រកសត្វព្រៃភ្នំឱរ៉ាល់តំបន់កំពង់ស្ពឺ ចាត់វិធានតាមនីតិវិធី។
ទាក់ទងករណីនេះលោក ហ៊ុល ម៉ារា មេកងដឹកនាំក្រុមមន្ត្រីឧទ្យានុរក្ស ដែនជម្រកសត្វព្រៃភ្នំឱរ៉ាល់តំបន់កំពង់ស្ពឺ ក្រោយមន្ត្រីកងរាជអាវុធហត្ថអញ្ជើញទៅទទួលបទល្មើសបានឱ្យអ្នកសារព័ត៌មានដឹងថា លោកមិនដឹងទេករណីនេះ បើដឹងនឹងចាប់ម្ចាស់ឈើនោះហើយ។ ចំណែកករណីដឹកឈើចេញ១រថយន្តយីឌុប កាលពីរាត្រីរំលងអាធ្រាតថ្ងៃទី២៧ ខែមេសា ឆ្នាំ២០២១ ចេញពីតំបន់លោកគ្រប់គ្រងមកដាក់ដេប៉ូចែលីន នៅក្នុងភូមិអំពែភ្នំ សង្កាត់ស្វាយក្រវ៉ាន់ ក្រុងច្បារមន ក៏លោកថាមិនដឹងដែរ។
ទោះយ៉ាងនេះក្ដីប្រភពក្រៅផ្លូវការថា ករណីនេះអាចមកពីរឿងផលប្រយោជន៍៕
