លោកយាយ អាយុចំណាស់ជាងគេបំផុតលើពិភពលោកទទួលមរណភាពក្នុងជន្មាយុ ១១៨ឆ្នាំ

ទីភ្នាក់ងារសារព័ត៌មាន AFP ចេញផ្សាយកាលពីថ្ងៃពុធទី១៨ មករាឆ្នាំ២០២៣ បានឱ្យដឹងថា ដូនជីជនជាតិបារាំង Lucile Randon ដែលមានអាយុចំណាស់ជាងគេបំផុតលើពិភពលោកបានទទួលមរណភាពក្នុង ជន្មាយុ ១១៨ឆ្នាំ នេះបើតាមលោក DavidTavella អ្នកនាំពាក្យមណ្ឌលថែទាំចាស់ជរា ស្ថិតនៅក្រុងToulon ភាគខាងត្បូងនៃប្រទេសបារាំងបានជូនដំណឹងស្តីពីមរណភាពរបស់លោកយាយ។

មរណភាពរបស់លោកយាយបានធ្វើអោយលោកយាយអេស្ប៉ាញ Maria Branyas ដើមកំណើតអាមេរិកជាប់កំណត់ត្រា Guinness World Records ក្នុងនាមជាបុគ្គលដែលកំពុងរស់នៅ ហើយមានវ័យចំណាស់ជាងគេបំផុតលើពិភពលោក។ គិតត្រឹមថ្ងៃទី១៧ ខែមករាលោកយាយមានអាយុ ១១៥ឆ្នាំ និង៣២០ថ្ងៃ។

លោកយាយRandon ត្រូវបានគេស្គាល់ថា Sister Andre បានកើតនៅភាគខាងត្បូងប្រទេសបារាំងនៅថ្ងៃទី១១ ខែកុម្ភៈ ឆ្នាំ១៩០៤នៅពេលដែលសង្គ្រាមលោកលើកទី១ នៅសល់មួយទសវត្សរ៍ទៀត។

គួររំឭកថាស្ត្រីបារាំងឈ្មោះ Jeanne Louise Clament ដែលបានទទួលមរណភាពកាលពីឆ្នាំ១៩៩៧ ក្នុងវ័យ១២២ឆ្នាំ និង១៦៤ថ្ងៃគឺជាស្ត្រីដែលមានអាយុច្រើនជាងគេបំផុត។ រីឯបុរសដែលមានអាយុវែងជាងគេគឺលោកតា Jiroemon Kimura ជនជាតិជប៉ុនដែលបានទទួលមរណភាពនៅឆ្នាំ២០១៣ក្នុងវ័យ១១៦ឆ្នាំ និង៥៤ថ្ងៃ៕