ដើម្បីបង្ការការឆ្លងវីរុសណូរ៉ូដែលមេរោគនេះបានសម្លាប់មនុស្សនៅលើពិភពលោកប្រមាណ២០ម៉ឺននាក់ជារៀងរាល់ឆ្នាំ។ ក្រសួងសុខាភិបាលបានធ្វើការណែនាំប្រជាពលរដ្ឋ ពិសេសកុមារអាយុក្រោម៥ឆ្នាំ និងមនុស្សចាស់ត្រូវមានការប្រុងប្រយ័ត្នខ្ពស់ចំពោះការបរិភោគចំណីអាហារ ពិសេសអាហារសមុទ្រដូចជា អយស្ទ័រឆៅ។
ការណែនាំរបស់ក្រសួងសុខាភិបាលបែបនេះ ដោយសារការរាតត្បាតជំងឺបង្កដោយវីរុសណូរ៉ូភាគច្រើនកើតមាននៅប្រទេសមានរដូវត្រជាក់ កន្លែងមានការប្រមូលផ្តុំអាកាសធាតុត្រជាក់មេរោគរស់យូររដូវត្រជាក់ធ្វើឲ្យប្រព័ន្ធភាពស៊ាំរបស់រាងកាយចុះខ្សោយ។ បុគ្គលគ្រប់វ័យអាចឆ្លង និងឈឺដោយវីរុសណូរ៉ូ រោគសញ្ញាជាទូទៅកើតមានចន្លោះពី ១២ ទៅ ៤៨ម៉ោង បន្ទាប់ពីប៉ះពាល់ ឬប្រឈមនឹងវីរុសណូរ៉ូ។ រោគសញ្ញាភាគច្រើនមាន រាក ក្អួតចង្អោរ ចុកពោះ និងអាចមានក្តៅខ្លួន ឈឺក្បាល និងឈឺខ្លួន។ ភាគច្រើនជាសះស្បើយឡើងវិញក្នុងរយៈពេល ១ ទៅ ៣ថ្ងៃ ប៉ុន្តែអាចចម្លងមេរោគទៅអ្នកដទៃបានក្នុងអំឡុង២សប្តាហ៍ ឬលើសបន្ទាប់ពីជាសះស្បើយ។ អ្នកអាចកើតជំងឺបង្កដោយវីរុសណូរ៉ូ ច្រើនដងក្នុងជីវិតរបស់អ្នក ពីព្រោះវីរុសណូរ៉ូ មានច្រើនប្រភេទ។ ការឆ្លង វីរុសណូរ៉ូ មួយប្រភេទមិនអាចការពារអ្នកពីប្រភេទផ្សេងទៀតឡើយ។ អាហារសមុទ្រជាពិសេសអយស្ទ័រឆៅ អាចមានផ្ទុកវីរុសនេះហើយកុមារអាយុក្រោម ៥ឆ្នាំ មនុស្សចាស់ និងអ្នកដែលមានប្រព័ន្ធការពាររាងកាយខ្សោយទំនងជាងាយរងគ្រោះធ្ងន់ធ្ងរពេលឆ្លងវីរុស។
ដើម្បីបង្ការជំងឺនេះក្រសួងសុខាភិបាលបានណែនាំឱ្យប្រជាពលរដ្ឋត្រូវប្រកាន់អនាម័យលាងសម្អាតដៃឱ្យបានញឹកញាប់សម្អាត និងសម្លាប់មេរោគលើផ្ទៃដែលមានមេរោគ ចម្អិនម្ហូបអាហារឱ្យបានឆ្អិនល្អ ពិសេសអាហារសមុទ្រ ពីព្រោះមេរោគស្លាប់នៅសីតុណ្ហភាពលើសពី ៦០ អង្សាសេ ស្នាក់នៅផ្ទះពេលឈឺរយៈពេល ២ថ្ងៃ (៤៨ ម៉ោង) បន្ទាប់ពីបាត់រោគសញ្ញា។ បើមានរោគសញ្ញាដូចខាងលើ សូមទៅពិគ្រោះជំងឺ នៅតាមមណ្ឌលសុខភាព ឬមន្ទីរពេទ្យរដ្ឋ ដែលនៅជិតផ្ទះលោកអ្នក។
គួររម្លឹកថា ជារៀងរាល់ឆ្នាំនៅលើសកលលោកមាន ៦៨៥លានករណីបង្កដោយវីរុសណូរ៉ូ ស្លាប់ប្រមាណ ២០០ ០០០នាក់ ក្នុងនោះដែរ ២០០លានករណីកើតលើកុមារអាយុក្រោម៥ឆ្នាំ និងមានកុមារចំនួន
៥០ ០០០នាក់បានស្លាប់៕
