រថយន្ដមួយគ្រឿងបើកចូលហ្វូងមនុស្សនៅសង្កាត់ Derik ក្នុងក្រុង Mardin ប្រទេសតួកគី កាលពីថ្ងៃទី ២០ ខែសីហា ឆ្នាំ២០២២ ដែលបានធ្វើឱ្យមនុស្សស្លាប់អស់យ៉ាងហោចណាស់ចំនួន ១៦ នាក់និងរងរបួសចំនួន ២៩ នាក់។
រដ្ឋមន្ត្រីសុខាភិបាលទួរគី លោក Fahrettin Koca បាននិយាយថា ឧបទ្ទវហេតុនេះបានកើតឡើងបន្ទាប់ពីរថយន្តដាច់ហ្វ្រាំងរេចង្កូតក្រឡាប់មិនបានសម្រេច ហើយរថយន្តនោះបានបុកអ្នកថ្មើរជើងមួយក្រុមនៅក្នុងទីក្រុង Derik។
លោករដ្ឋមន្ត្រីបានកត់សម្គាល់ថា អ្នករបួសចំនួនប្រាំបីនាក់មានសភាពធ្ងន់ធ្ងរ ហើយគ្រូពេទ្យជំនាញកំពុងព្យាយាមប្រើគ្រប់មធ្យោបាយទាំងអស់ ដើម្បីជួយសង្គ្រោះពួកគេ។
រដ្ឋមន្ត្រីក្រសួងយុត្តិធម៌ Bekir Bozdag បានប្រកាសនៅលើ Twitter ថា ព្រះរាជអាជ្ញាបានបើកការស៊ើបអង្កេតចំនួនពីរលើគ្រោះថ្នាក់នេះ។
ទីភ្នាក់ងារ Anadolu បានរាយការណ៍ថា ប្រធានាធិបតី Recep Tayyip Erdogan បានបញ្ជូនរដ្ឋមន្ត្រីមហាផ្ទៃ Suleyman Soylu ទៅកាន់ទីកន្លែងនៃឧបទ្ទវហេតុនេះ ដើម្បីស្រាវជ្រាវពិនិត្យអង្គហេតុដែលកើតឡើង។
បច្ចុប្បន្នសមត្ថកុច្ចជំនាញកំពុងសាកសួរអ្នកបើកបររថយន្តក្រុង នូវអ្វីដែលកើតឡើងដ៏សាហាវបែបនេះ។
បើតាមប្រព័ន្ធផ្សព្វផ្សាយទួរគីបានចែករំលែកវីដេអូនៃអ្នកបើកបរម្នាក់បាត់បង់ការគ្រប់គ្រងលើរថយន្តដឹកទំនិញរបស់គាត់ បន្ទាប់មកគាត់ព្យាយាមបញ្ជាចង្កូតគេចពីរថយន្តនៅក្បែរនោះ និងអ្នកថ្មើរជើងនៅពេលពួកគេព្យាយាមរត់គេច។
សូមរម្លឹកថា វាជាឧបទ្ទវហេតុដ៏សោកនាដកម្មលើកទីពីរក្នុងថ្ងៃតែមួយនៅប្រទេសតួកគី។ បន្ទាប់ពីព្រឹកថ្ងៃដដែល មានករណីរថយន្តក្រុង និងរថយន្តសង្គ្រោះបានបើកបុកគ្នាក្នុងខេត្ត Gaziantep ជារួមមនុស្ស ១៦នាក់បានស្លាប់។ ក្នុងនោះត្រូវគេរាយការមកថា មានគ្រូពេទ្យបីនាក់ អ្នកពន្លត់អគ្គីភ័យបីនាក់ និងអ្នកកាសែតពីរនាក់មកពីទីភ្នាក់ងារព័ត៌មាន İhlas ស្ថិតក្នុងចំណោមអ្នកស្លាប់នោះផងដែរ៕
