ក្រុមហ៊ុន Adidas លើកឡើងពីកង្វល់ និងស្នើសុំឱ្យមានការស៊ើបអង្កេតលើករណីបំពានទៅលើសិទ្ធិសេរីភាពសមាគម និងការចាប់ខ្លួនតំណាងកម្មករ ពាក់ព័ន្ធនឹងករណីកូដកម្មនៅរោងចក្រCan Sports Shoes Cambodia ក្នុងខេត្តកំពង់ឆ្នាំង កាលពីថ្ងៃទី៣១ ខែឧសភា ឆ្នាំ២០២២ កន្លងមកនេះ។ នេះបើតាមការចុះផ្សាយរបស់អង្គការសង់ត្រាល់ Central។
នៅក្នុងលិខិតរបស់ក្រុមហ៊ុន Adidas ផ្ញើទៅរដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈនៅថ្ងៃទី១៤ ខែមិថុនា ឆ្នាំ២០២២ កន្លងមកនេះឲ្យដឹងថា វិវាទការងារចំបងនៅក្នុងរោងចក្រ គឺកើតចេញពីការទាមទារឲ្យមានអ្នកលក់ដូរអាហារក្នុងបរិវេណរោងចក្រ និងទាមទារអោយពន្លឿនការកាត់ប្រាក់វិភាគទានប្រចាំខែជូនសហជីពពីប្រាក់ ខែកម្មករដែលផ្លាស់ប្ដូរពីសហជីពចាស់ទៅសហជីពថ្មី។ ក្នុងពេលដែលកំពង់ចរចា និងធ្វើកូដកម្មដោយសន្តិវិធី គឺថ្នាក់ដឹកនាំសហជីពសរុប ៣នាក់ត្រូវសមត្ថកិច្ចចាប់ខ្លួន ប៉ុន្តែបានដោះលែងវិញ ដោយតម្រូវឲ្យចុះហត្ថលេខាលើកិច្ចសន្យាមិនបន្តកូដកម្ម។
ទាក់ទងករណីនេះ 1Post មិនទាន់អាចសុំការបញ្ជាក់ពីក្រសួងការងារបាននៅឡើយ។
លិខិតក្រុមហ៊ុន Adidas ដដែលបានលើកឡើងទៀតថា មូលហេតុនៃការចាប់ខ្លួននៅតែមិនទាន់មានភាពច្បាស់លាស់នៅឡើយ ប៉ុន្តែបានភ្ជាប់ទៅនឹងបទញុះញង់ឱ្យប្រព្រឹត្តបទ ឧក្រិដ្ឋជាអាទិ៍។
ក្រុមហ៊ុន Adidas បានទទូចឲ្យរដ្ឋាភិបាលកម្ពុជា ការអនុវត្តតួនាទី និងកាតព្វកិច្ចរបស់រដ្ឋាភិបាលឱ្យបានត្រឹមត្រូវ តាមអនុសញ្ញា ILO ច្បាប់សហជីព និងច្បាប់ការងាររបស់កម្ពុជា។
ក្រុមហ៊ុន Adidas បានស្នើទៅក្រសួង ឲ្យស៊ើបអង្កេតលើសកម្មភាពអនុវត្តការងាររបស់ប៉ូលិស។ជូនដំណឹងដោយតម្លាភាពអំពីលទ្ធផលបន្ទាប់ពីការស៊ើបអង្កេត និងជូនដំណឹងដល់ភាគីរងផលប៉ះពាល់ និងការពារមិនឲ្យមានហេតុការណ៍នេះកើតឡើងបន្តទៀតនាពេលអនាគត៕ ប្រភពCentral
