ពលរដ្ឋចំនួន ១០នាក់ តំណាងឱ្ពលរដ្ឋយ៨៤គ្រួសារ មកពីឃុំព្រែកស្លែង និងឃុំបឹងខ្យាង ស្រុកកណ្ដាលស្ទឹង ដែលមានបញ្ហាទំនាស់ដីជាមួយក្រុមហ៊ុនព្រលានយន្តហោះអន្តរជាតិថ្មី នៅខេត្តកណ្ដាល នៅព្រឹកថ្ងៃទី០៦ ខែមេសា ឆ្នាំ២០២២ បានប្រមូលផ្ដុំគ្នាដាក់ញត្តិនៅតាមស្ថានទូតមួយចំនួន ដើម្បីស្នើដល់ស្ថានទូតជួយអន្តរាគមន៍ទៅរដ្ឋាភិបាលកម្ពុជាពន្លឿនការដោះស្រាយដែលអាចទទួលយកបាន។
ញាត្តិដែលពួកគាត់បានដាក់មានដូចជា ស្ថានទូតអាមេរិក អូស្ត្រាលី បារាំង ជប៉ុន និងចិន។ នៅក្នុងនោះកាលពីថ្ងៃទី២១ ខែកញ្ញា ឆ្នាំ២០២១ អង្គការសង្គមស៊ីវិលចំនួន៣១ស្ថាប័នបានចេញសេចក្ដីថ្លែងការណ៍មួយស្នើដល់ស្ថាប័នពាក់ព័ន្ធផ្ដល់សំណងឱ្យបានសមស្របតាមតម្លៃទីផ្សារជូនប្រជាពលរដ្ឋដែលកំពុងរងផលប៉ះពាល់ដីធ្លីពីគម្រោងអភិវឌ្ឍន៍ព្រលានយន្តហោះអន្តរជាតិភ្នំពេញថ្មីនេះ និងចៀសវាងនូវកិច្ចព្រមព្រៀងដោយមានការបង្ខិតបង្ខំ ដើម្បីរក្សានូវការគោរពសិទ្ធិមនុស្សដែលទទួលស្គាល់ដោយរដ្ឋធម្មនុញ្ញកម្ពុជា។
ជុំវិញផលប៉ះពាល់ដីធ្លីពីគម្រោងអភិវឌ្ឍន៍ព្រលានយន្តហោះថ្មីនេះខាងអាជ្ញាធរនៅតែរក្សាជំហរផ្ដល់សំណងត្រឹមតែ៨ដុល្លារក្នុងមួយម៉ែត្រការ៉េ និងការដោះដូរដី ប៉ុន្តែអ្នកភូមិមិនអាចទទួលយកបាន ដោយគិតថាសំណងនោះតិចតួចពេក មិនអាចយកទៅទិញដីនៅក្បែរតំបន់ពួកគាត់បានទេ។
សូមរម្លឹកថា កាលពីថ្ងៃទី៣ ខែមិថុនា ឆ្នាំ២០២០ រដ្ឋាភិបាលបានចេញអនុក្រឹត្យមួយដោយផ្ដល់ដីរដ្ឋទំហំប្រមាណ២ ៦០០ហិកតា ដែលលាតសន្ធឹងលើស្រុកកណ្ដាលស្ទឹង ខេត្តកណ្ដាល និងស្រុកបាទី ខេត្តតាកែវ ទៅឱ្យក្រុមហ៊ុនវិនិយោគអាកាសយានដ្ឋានកម្ពុជា (CAIC) វិនិយោគរួមគ្នាជាមួយសាជីវកម្មក្រៅប្រទេស និងលេខាធិការដ្ឋានអាកាសចរណ៍ស៊ីវិល៕ Cre- VOD
រូបភាពឯកសារ
