ក្រោយឡើងខ្នងផ្សារនាយករដ្ឋមន្ត្រី ដាក់ភារកិច្ចច្បាស់ៗឱ្យរដ្ឋមន្ត្រីចំនួន ២ និងអភិបាលខេត្ត

កាលពីថ្ងៃសៅរ៍ទី៨ មីនា ឆ្នាំ២០២៥ បន្ទាប់សម្ដេចនាយករដ្ឋមន្ត្រីឡើងទៅតំបន់ទេសចរណ៍ខ្នងផ្សារ និងបានជួបជាប្រធាន អនុប្រធាន សហគមន៍ទេសចរណ៍ធម្មជាតិតាំងបំពង់ ស្តាប់ពីស្ថានភាពជីវភាពរបស់ប្រជាជន ក៏ដូចជាសំណូមពរដើម្បីជួយដល់សហគមន៍ រួមទាំងពិនិត្យនូវទិដ្ឋភាពជាក់ស្តែងសម្ដេចនាយកបានសម្រេចដូចជា÷ ១. ប្រគល់ភារកិច្ចជូនឯកឧត្តមរដ្ឋមន្ត្រីក្រសួងបរិស្ថាន និងឯកឧត្តមអភិបាលនៃអភិបាលខេត្តកំពង់ស្ពឺ÷

- សហការអភិរក្សនិងថែរក្សាតំបន់ទេសចរណ៍ខ្នងផ្សារ ខ្នងសំពៅ នៃឧទ្យានជាតិភ្នំក្រវ៉ាញអោយបានល្អ សម្រាប់ផលប្រយោជន៍សាធារណៈនិងសហគមន៍នៅតំបន់នេះ។

- សិក្សារៀបចំហេត្ថារចនាសម្ព័ន្ធគាំទ្រនិងសេវាកម្មគាំទ្រ ដូចជាផ្លូវ បន្ទប់ទឹក កន្លែងលក់អាហារ  កន្លែងសង្គ្រោះបន្ទាន់ ។ល។ ទៅតាមស្តង់ដារ និងទុកជាប្រយោជន៍ជូនសហគមន៍ ដើម្បីធ្វើអោយប្រសើរឡើងនូវការផ្តល់សេវាជូនទេសចរណ៍ដែលមកកំសាន្តនៅទីនេះ។

- សិក្សាធ្វើអោយប្រសើរឡើងនូវប្រព័ន្ធផ្គត់ផ្គង់ទឹកនៅលើតំបន់ភ្នំខ្នងផ្សារ ក៏ដូចជាសម្រាប់ប្រជាពលរដ្ឋរស់នៅតំបន់ជើងភ្នំផងដែរ។ 

២. ប្រគល់ភារកិច្ចជូនឯកឧត្តម រដ្ឋមន្ត្រីក្រសួងទេសចរណ៍ សហការណ៍ សម្របសម្រួល ជាមួយក្រសួងបរិស្ថាន គណៈអភិបាលខេត្ត ប្រតិបត្តិករទេសចរណ៍និងសហគមន៍ ដើម្បីជំរុញទេសចរណ៍ធម្មជាតិនៅតំបន់នោះឱ្យកាន់តែប្រសើរឡើង ក៏ដូចជាការជួយបង្កើនសមត្ថភាពរបស់សហគមន៍ក្នុងការផ្ដល់សេវាទេសចរណ៍ផងដែរ។ ទាំងនេះនឹងអាចចូលរួមចំណែកក្នុងការលើកកម្ពស់ជីវភាពរស់នៅរបស់ប្រជាពលរដ្ឋនៅក្នុងតំបន់នោះ៕