បើតាមសេចក្តីរាយការណ៍របស់ទីភ្នាក់ងារសារព័ត៌មាន AP បានឱ្យដឹងថា រដ្ឋបាលលោកប្រធានាធិបតី Donald Trump កាលពីថ្ងៃអង្គារនិយាយថាខ្លួននឹងដកបុគ្គលិកនៅក្រៅប្រទេសស្ទើរតែទាំងអស់នៃទីភ្នាក់ងារសហរដ្ឋអាមេរិកសម្រាប់ការអភិវឌ្ឍអន្តរជាតិ ហៅកាត់ថា USAID ចេញពីការងារនិងចេញពីការិយាល័យនៅជុំវិញពិភពលោក។ វិធានការនេះបញ្ចប់ស្ទើរតែទាំងស្រុងនូវបេសកកម្ម៦ទសវត្សរ៍ក្នុងការពង្រឹងសន្តិសុខអាមេរិកតាមរយៈការប្រយុទ្ធនឹងភាពអត់ឃ្លាន ការផ្តល់មូលនិធិដល់ការអប់រំ និងកិច្ចការដើម្បីបញ្ចប់ជំងឺរាតត្បាត។
រដ្ឋបាលលោក Trump បានជូនដំណឹងដល់បុគ្គលិកទីភ្នាក់ងារ USAID តាមអ៊ីមែលនិងការជូនដំណឹងនៅលើគេហទំព័រ ដែលនេះជាចំណាត់ការចុងក្រោយបំផុតនៃការបិទភ្លាមៗនូវទីភ្នាក់ងារជំនួយបរទេសនេះ ដោយអតីតមន្ត្រីក្នុងអាណត្តិទី១របស់លោក Trump ដែលត្រឡប់មកកាន់តំណែងវិញ និងក្រុមប្រសិទ្ធិផលការងាររដ្ឋាភិបាលរបស់មហាសេដ្ឋីលោក Elon Musk ដែលបានហៅការចំណាយលើកម្មវិធីនានានៅក្រៅប្រទេសថាជាការខ្ជះខ្ជាយថវិកា។ បទបញ្ជានេះនឹងចូលជាធរមានពាក់កណ្តាលអាធ្រាត្រថ្ងៃសុក្រចូលថ្ងៃសៅរ៍ ហើយកំណត់ឱ្យបុគ្គលិកមិនចាំបាច់ទាំងអស់នៅក្រៅប្រទេសមានពេល៣០ថ្ងៃដើម្បីត្រឡប់មកសហរដ្ឋអាមេរិកវិញ។ បុគ្គលិកជាច្រើនបានស្រវាស្រទេញត្រៀមខ្លួនរើចេញរួចទៅហើយដោយរំពឹងថានឹងមានសេចក្តីប្រកាសបែបនេះ។
សេចក្តីជូនដំណឹងនេះបានបន្តថាបុគ្គលិកជាប់កិច្ចសន្យាដែលត្រូវកំណត់ថាមិនចាំបាច់នឹងត្រូវបញ្ឈប់ពីការងារ។ វិធានការនេះត្រូវបានគេសង្ស័យជាច្រើនថ្ងៃមកហើយ ហើយជាវិធានការខ្លាំងក្លាបំផុតក្នុងចំណោមវិធានការនានាដែលត្រូវបានគេស្នើឡើងក្នុងដំណើរការដើម្បីបញ្ចូលទីភ្នាក់ងារ USAID ទៅក្នុងស្ថាប័នក្រសួងការបរទេសសហរដ្ឋអាមេរិកវិញ៕
