ម្ដាយកូនពីរនាក់កំពុងតែជិះម៉ូតូមួយគ្រឿងតាមផ្លូវក៏ស្រាប់តែត្រូវរថយន្តស៊េរីទំនើបម៉ាកឡង់គ្រីស័រ បើកបុកពេញទំហឹងបណ្ដាលឱ្យស្លាប់ភ្លាមៗនៅនឹងកន្លែងកាលពីវេលាម៉ោង១និង៤០នាទីរសៀល ថ្ងៃទី៣១ ខែធ្នូ ឆ្នាំ២០២២ នៅលើផ្លូវក្រាលកៅស៊ូថ្មី ស្ថិតក្នុងភូមិបុសថ្លាន់ ឃុំស្វាយទាបស្រុកចំការលើ។
លោក សន ពុទ្ធថា អធិការរងនគរបាលស្រុកចំការលើ បានឱ្យដឹងថា ម៉ូតូមួយគ្រឿងជិះគ្នា២នាក់ម្ដាយនិងកូន បើកបរក្នុងទិសដៅពីត្បូងមកជើងអែបស្ដាំដៃ ចំណែករថយន្តវិញបានបើកក្នុងទិសដៅច្រាសគ្នា។ លុះមកដល់ចំណុចកើតហេតុក៏បានបុកម៉ូតូពេញទំហឹងជាហេតុធ្វើឲ្យម្ដាយនិងកូនប្លោងចេញពីម៉ូតូបាត់បង់ជីវិត។ រីឯរថយន្តនោះរេចង្កូតធ្លាក់ផ្លូវទៅបុកដើមឈើបាក់អស់មួយដើមទៀត ទើបទៅមុខលែងរួច អ្នកបើករថយន្តវ័យ៧២ឆ្នាំក៏ត្រូវបានកម្លាំងជំនាញចរាចរណ៍ធ្វើការឃាត់ខ្លួនផងដែរ។
សូមបញ្ជាក់ថា ចំណុចកើតហេតុគ្រោះថ្នាក់ចរាចរណ៍ខាងលើនេះ គឺនៅស្ដាំដៃម៉ូតូ ហើយស្ថិតនៅចំណុចផ្លូវរាងកោងទៀតផង។ រថយន្តបង្កខាងលើម៉ាក TOYOTA LAND CRUISER ពណ៌ខ្មៅពាក់ស្លាកលេខ ភ្នំពេញ.2AK- 2546 បើកបរដោយឈ្មោះ លឹម តារាមាណី ភេទប្រុស អាយុ៧២ឆ្នាំ អ្នករួមដំណើរម្នាក់មានឈ្មោះ លឹម ទេវី ភេទស្រី អាយុ៦៦ឆ្នាំ ទាំង០២នាក់រស់នៅភូមិ១១ ស្ថិតក្នុងសង្កាត់បឹងកក់២ ខណ្ឌទួលគោក រាជធានីភ្នំពេញ។
ម៉ូតូ០១ ម៉ាកវ៉េវ ពណ៌ក្រហម ពាក់ស្លាកលេខកំពង់ចាម1I-0704 បើកបរដោយឈ្មោះ ហ៊ន ញ៉ាញ់ ភេទស្រី អាយុ២៩ឆ្នាំ អ្នករួមដំណើរម្នាក់មានឈ្មោះ អេន ឆេងគ័ង្គ ភេទប្រុស អាយុ០៤ឆ្នាំ ទាំង០២នាក់រស់នៅភូមិបុសថ្លាន់ ឃុំស្វាយទាបស្រុកចំការលើ ខេត្តកំពង់ចាម៕ រំចង់
