បាត់ដំបង៖ សមត្ថកិច្ចចម្រុះកម្ពុជា-ថៃ កាលពីថ្ងៃទី២៥ ខែកញ្ញា ឆ្នាំ២០២២ បានធ្វេីការឃាត់ខ្លួនបុរសម្នាក់ដែលជាជនសង័្សយក្នុងករណីសម្លាប់ស្រ្តីម្នាក់ដាក់ក្នុងរថយន្តព្រូស PRIUS មួយគ្រឿងយកមកប្លុងចោលនៅក្រោយផ្សារភូពុយស្ថិតនៅសង្កាត់អូរចារ ក្រុងបាត់ដំបង ដែលបានប្រទះឃេីញកាលពីថ្ងៃទី១៤ ខែកញ្ញា ឆ្នាំ២០២២។
បុរសម្នាក់នោះឈ្មោះ មាស ពេជ្របូរមី អាយុ២៨ឆ្នាំ បច្ចុប្បន្នរស់នៅភូមិភ្នំពេញថ្មី សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ មានមុខរបរមិនពិតប្រាកដ។
នៅចំពោះមុខសមត្ថកិច្ចនគរបាលជនដៃដល់រូបនេះបានសារភាពថា រូបគេពិតជាបានសម្លាប់ស្រ្តីជាជនរងគ្រោះខាងលេីប្រាកដមែន ដែលការសម្លាប់នេះប្រព្រឹត្តនៅក្នុងរថយន្ត បន្ទាប់ពីរូបគេនិងជនរងគ្រោះកេីតជម្លោះពាក្យសម្ដីជាមួយគ្នាក្នុងពេលរួមធ្វេីដំណេីរដោយរថយន្ត ហេីយចំណុចប្រព្រឹត្តិនេះធ្វេីឡេីងនៅឯជាយរាជធានីភ្នំពេញ រួចបេីករថយន្តដឹកសពស្រ្តីរូបនោះយកមកប្លុងចោលនៅក្រោយផ្សារភូពុយក្នុងក្រុងបាត់ដំបង អំឡុងថ្ងៃទី១២ ខែកញ្ញា ឆ្នាំ២០២២ រួចគេចខ្លួនបាត់ រហូតដល់រសៀលថ្ងៃទី១៤ ខែកញ្ញា ឆ្នាំ២០២២ ទេីបគេប្រទះឃេីញសាកសពនៅក្នុងរថយន្តបន្ទាប់ពីមានក្លិនស្អុយភាយចេញមកខាងក្រៅ។
បច្ចុប្បន្នសមត្ថកិច្ចកំពុងបន្តធ្វេីការស្រាវជ្រាវបន្ថែម និងកសាងសំណុំរឿងចាត់វិធានការតាមនិតិវិធី។
សូមរម្លឹកថា សូមជម្រាបជូនថាកាលពីព្រលប់ថ្ងៃទី១៤ ខែកញ្ញា ឆ្នាំ២០២២ មានការភ្ញាក់ផ្អេីលមួយដោយសារគេបានប្រទះឃើញស្ត្រីម្នាក់បានស្លាប់នៅបាំងខាងក្រោយនៃរថយន្តម៉ាកព្រូសPRIUS ព៌ណទឹក ប្រាក់ ពាក់ស្លាកលេខ ភ្នំពេញ2BQ-1371 ស្ថិតនៅខាងក្រោយបរិវេណផ្សារទំនើបភូពុយ ស្ថិតក្នុងភូមិអញ្ចាញ សង្កាត់អូរចារ ក្រុងបាត់ដំបង ខេត្តបាត់ដំបង។
តាមរយៈការស្រាវជ្រាវដែលបានធ្វេីឡេីងនៅថ្ងៃបន្ទាប់បានឱ្យដឹងថា ស្រ្តីជាជនរងគ្រោះមានឈ្មោះ ឌីម សោភា អាយុ៣៤ឆ្នាំ មានស្រុកកំណើតនៅខេត្តកំពង់ចាម ហើយបច្ចុប្បន្នរស់នៅសង្កាត់ក្រាំងធ្នង់ ខណ្ឌសែនសុខ រាជធានីភ្នំពេញ មានមុខរបរជាអ្នកសំអាង និងកែសម្ផស្សព្រមទាំងលក់ដីឡូត៍ និងលក់អនឡាញទៀតផង។
បើតាមប្ដីស្ត្រីរងគ្រោះបានឱ្យដឹងថា ប្រពន្ធរបស់គាត់បានចាកចញពីផ្ទះទៅចូលរួមពិធីខួបកំណើតគេជាមួយរថយន្តខាងលេី កាលពីថ្ងៃកាន់បិណ្ឌទី១ គឺអំឡុងថ្ងៃ១១ ខែកញ្ញា ឆ្នាំ២០២២ ហេីយបាត់ការទាក់ទងតាមទូរស័ព្ទចាប់ពីថ្ងៃទី១២ ខែកញ្ញា ឆ្នាំ២០២២ រហូតដល់ថ្ងៃដែលគេប្រទះឃេីញរថយន្តនិងសាកសពនោះតែម្តង៕ 1Post
