សេចក្ដីរាយការបានឱ្យដឹងថា ភាពអនាធិបតេយ្យលើសពីគ្រាមុនក្នុងរយៈពេលចុងក្រោយនេះនៅខេត្តកំពង់ស្ពឺ លើសកម្មភាពកាយខ្សាច់កាយដី និងបូមខ្សាច់នៅក្នុងស្ទឹងព្រែកត្នោតធ្វើទៅបានទាំងពុំទាន់បំពេញច្បាប់ឱ្យបានត្រឹមត្រូវ និងដឹកជញ្ជូនល្មើសបច្ចេកទេស ដឹកលើសទ្រុងមិនគ្របធ្លាក់ដីនិងខ្សាច់លើផ្លូវ បង្កការរំខានដល់ការធ្វើដំណើរ រំខានដល់សុខភាព រំខានដល់ជីវភាព និងខូចផ្លូវនៅតាមបណ្ដាភូមិមួយចំនួន។ ដូចជារូបភាពនេះគឺនៅស្រែអំបិល ដែលជាសកម្មភាពមួយក្រុមផ្សេងទៀត។
ការធ្វើរបៀបទំនើងចិត្តត្រូវបានគេខ្សឹបខ្សៀវពីមាត់មួយទៅមាត់មួយថា មកពីមានការគប់គិតគ្នារវាងឈ្មួញអ្នករកស៊ីជាមួយអស់លោកមួយចំនួនដែលសំអាងមេកើយរបស់ខ្លួនជាអ្នកមានអំណាចធំនៅពីក្រោយ ដែលពួកគេទាំងនោះបែងចែកមុខការគ្នាធ្វើដើម្បីលាភសក្ការយ៉ាងព្រហើន និងទូលំទូលាយ។ រូបភាពនេះគឺកាយនិងដឹកចេញពីភូមិឈើទាល ខេត្តកំពង់ស្ពឺ ធ្វើទៅបានយ៉ាងរលូនជិត ១០ថ្ងៃមហើយ យកទៅលក់ឱ្យថៅកែនៅស្រុកអង្គស្នួល ខេត្តកណ្ដាល។
ទាក់ទងសកម្មភាពនេះលោក ញ៉ាញ់ ជាបហង ប្រធានមន្ទីរធនធានទឹកខេត្តកំពង់ស្ពឺ មិនទាន់មានការបញ្ជាក់ទេ ផ្ញើសារមិនតប ខលចូលចុចបិទ គ្រាដែលលោកប្រធានរូបនេះក៏ជាអ្នកពាក់ព័ន្ធនឹងការកាយដីលក់នៅអូរក្រាំងអំបិល និងដីតាមប្រឡាយ ក្រោមហេតុផលជួយជាតិ ទាំងអាជីវកម្មនោះពុំមានច្បាប់ត្រឹមត្រូវ។ សម្លេង
ចំណែកលោក ប៊ិញ ជីវតុង ប្រធានមន្ទីររ៉ែ ខេត្តកំពង់ស្ពឺ ក្រោយការសាកសួរពីក្រុមការងារ 1Post លោកសួររកចំនុចទីតាំង។ រីឯប្រធានការិយាល័យរ៉ែ លោក បិន ថេត ថានឹងដឹកនាំក្រុមការងារចុះទៅដល់ទីតាំងដែលកំពុងកាយស្ទឹងនៅភូមិឈើទាល ឃុំត្រពាំងគង ស្រុកសំរោងទង ខេត្តកំពង់ស្ពឺ។
ដោយឡែកឧកញ៉ា ស្រ៊ុយ ម៉ៅ ជាប្រធានសម្ពន្ធសមាគមសហគ្រាសធុនតូចនិងមធ្យមកម្ពុជាខេត្តត្បូងឃ្មុំ ដែលពាក់ព័ន្ធនឹងជំនួញក្នុងស្ទឹងព្រែកត្នោត ក្រុមការងារយើងមិនទាន់អាចទំនាក់ទំនងសុំការបញ្ជាក់បាននៅឡើយ។
សូមរម្លឹកថា ក្រៅពីសកម្មភាពដូចខាងលើនេះ អ្នករកស៊ីចាក់បំពេញដីជាច្រើនបានរអ៊ូរទាំរឿងដ៏ថ្លាថ្លៃពេលសុំចំណារពីមេដៃធំផងដែរ៕ វីដេអូ https://www.facebook.com/share/v/18oaanE94P/?mibextid=wwXIfr
