ក្រសួងការពារជាតិរុស្ស៊ីបានអោយដឹងថា រុស្ស៊ី និងចិននឹងធ្វើសមយុទ្ធយោធាជើងទឹករួមគ្នាចាប់ពីថ្ងៃទី ២១-២៧ ខែធ្នូ។ នេះបើតាមទីភ្នាក់ងារព័ត៌មានរុស្ស៊ី Interfax បានរាយការណ៍កាលពីថ្ងៃចន្ទ។
សមយុទ្ធកងទ័ពជើងទឹករួមគ្នាដែលបានធ្វើឡើងជារៀងរាល់ឆ្នាំចាប់តាំងពីឆ្នាំ២០១២នឹងមានការបាញ់មីស៊ីលនិងកាំភ្លើងធំនៅក្នុងសមុទ្រចិនខាងកើត។គោលបំណងសំខាន់នៃសមយុទ្ធគឺដើម្បីពង្រឹងកិច្ចសហប្រតិបត្តិការកងទ័ពជើងទឹករវាងរុស្ស៊ី និងចិនដើម្បីរក្សាសន្តិភាពនិងស្ថិរភាពនៅក្នុងតំបន់អាស៊ីប៉ាស៊ីហ្វិក។
ទីក្រុងម៉ូស្គូបានព្យាយាមបង្កើនទំនាក់ទំនងនយោបាយ សន្តិសុខ និងសេដ្ឋកិច្ចរបស់ខ្លួនជាមួយទីក្រុងប៉េកាំង ហើយមើលឃើញថា មេដឹកនាំចិនលោក ស៊ីជីនពីងជាសម្ព័ន្ធមិត្តដ៏សំខាន់នៅក្នុងសម្ព័ន្ធភាពប្រឆាំងលោកខាងលិច។
រុស្ស៊ីបាននិយាយថា នាវាចំនួន៤គ្រឿងរបស់ខ្លួននឹងចូលរួមក្នុងសមយុទ្ធនេះ រួមទាំងនាវាផ្ទុកមីស៊ីលVaryag ខណៈពេលដែលចិនក៏មាននាវាចំនួន ៦គ្រឿងចូលរួម រួមជាមួយនឹងយន្តហោះ និងឧទ្ធម្ភាគចក្រមកពីភាគីទាំងពីរ៕
