ភ្នំពេញ៖ ក្រុមពលរដ្ឋរស់នៅភូមិព្រៃសាលា និងភូមិចំការឪឡឹក កាលពីម៉ោងជាង ៤រសៀលថ្ងៃទី២៥ វិច្ឆិកា ២០២២ បានកើតទុក្ខមិនសុខចិត្តលើកគ្នាទៅដកបង្គោលបេតុងដែលក្រុមហ៊ុន រ៉ូយ៉ាល់រេលវេ បោះបិទផ្លូវមិនអាចឱ្យរថយន្តឆ្លងកាត់បាន ស្ថិតនៅក្នុងភូមិព្រៃសាលា សង្កាត់កាកាបទី២ ខណ្ឌពោធិ៍សែនជ័យ រាជធានីភ្នំពេញ។
ក្រុមអ្នកភូមិបានឱ្យដឹងថា នៅចំណុចដែលក្រុមហ៊ុន រ៉ូយ៉ាល់រេលវេបោះបង្គោលនោះគឺជាផ្លូវសម្រាប់ពលរដ្ឋក្នុងភូមិជាង ២០០គ្រួសារ និងអ្នកធ្វើដំណើរផ្សេងទៀតឆ្លងកាត់ចេញចូលជាយូរមកហើយ។ បែជាគេបានយកកំណាត់សសរថ្មចំនួន ៦ដើម ទៅជីកដាំលើផ្លូវមិនអាចឱ្យរថយន្តចេញចូលឆ្លងកាត់ផ្លូវរថភ្លើងបានដូចកាលពីដើមឡើយ។
ទាក់ទងសកម្មភាពខាងលើ 1Post នៅមិនទាន់អាចទំនាក់ទំនងសុំការបញ្ជាក់ពីភាគីក្រុមហ៊ុន រ៉ូយ៉ាល់រេលវេ បាននៅឡើយ។
ទោះជាយ៉ាងនេះក្ដីពលរដ្ឋកើតឆ្ងល់ ក៏បានសំណូមពរដល់រដ្ឋបាលរាជធានីភ្នំពេញ មេត្តាជួយត្រួតពិនិត្យលើសកម្មភាពបោះបង្គោលនេះផង កុំចេះតែដើរបិទផ្លូវបែបនេះ។ បើសិនចំណុចឆ្លងកាត់ផ្លូវដែកនោះវាអាចបង្កគ្រោះថ្នាក់ ក៏ក្រុមហ៊ុនគួររៀបចំដាក់ប៉ារ៉ាស់ ឬរកវិធីផ្សេងទៀតដើម្បីបញ្ចៀស ប្រសើជាងបិទផ្លូវមិនឱ្យប្រជាពលរដ្ឋបើករថយន្តបានបែបនេះ។
គួររម្លឹកថា នាពេលកន្លងទៅគ្រោះថ្នាក់ចរាចរណ៍បានកើតឡើងជាច្រើនករណីនៅតាមបណ្ដាចំណុចផ្លូវប្រសព្វឆ្លងកាត់រវាងយានយន្តប្រជាពលរដ្ឋ និងរថភ្លើងរបស់ក្រុមហ៊ុន រ៉ូយ៉ាល់រេលវេ។ ដែលអ្នកពាក់ព័ន្ធទាំងអស់ ជាពិសេសអ្នកប្រើប្រាស់ផ្លូវនៅតាមចំណុចប្រឈមខាងលើ គួរតោងប្រយ័ត្នអំពីសុវត្ថិភាពឱ្យបានខ្ពស់មុននឹងធ្វើដំណើរឆ្លងកាត់៕ រំចង់
