ថៃពន្លឿនប្រាក់ជំនួយដល់គ្រួសាររងគ្រោះទឹកជំនន់ ខណៈអាជ្ញាធរបន្តឆ្លើយតប

រដ្ឋាភិបាលថៃកំពុងពន្លឿនការផ្ទៀងផ្ទាត់ និងបើកប្រាក់ជំនួយដល់គ្រួសារដែលរងផលប៉ះពាល់ពីទឹកជំនន់ ខណៈស្ថានការណ៍ទឹកជំនន់នៅតំបន់មួយចំនួននៅតែត្រូវបានតាមដានយ៉ាងជិតស្និទ្ធ។

គិតត្រឹមថ្ងៃទី៥ ខែតុលា មានគ្រួសារជាង ១,០៥ លានគ្រួសារ បានចុះឈ្មោះស្នើសុំជំនួយតាមកម្មវិធី Thang Rath។ បន្ទាប់ពីអាជ្ញាធរមូលដ្ឋានផ្ទៀងផ្ទាត់ព័ត៌មានរួច ការផ្ទេរប្រាក់ត្រូវបានគ្រោងធ្វើឡើងក្នុងរយៈពេលប្រហែល ២–៣ ថ្ងៃ។

តាមរដ្ឋាភិបាលថៃ គ្រួសារដែលមានលក្ខខណ្ឌតាមវិធានការជំនួយ អាចទទួលបានប្រាក់ពី ៥,០០០ដល់ ៩,០០០ បាត អាស្រ័យលើលក្ខខណ្ឌ និងរយៈពេលដែលលំនៅឋានរងផលប៉ះពាល់ដោយទឹកជំនន់។

ជាមួយគ្នានេះ រដ្ឋាភិបាលបានបញ្ជាឱ្យអាជ្ញាធរបង្កើនការបូម និងបង្ហូរទឹក ព្រមទាំងត្រៀមស្បៀងសម្ភារៈសង្គ្រោះ និងទីជម្រកសម្រាប់ប្រជាពលរដ្ឋ ខណៈមានការព្រមានពីភ្លៀងខ្លាំងបន្ថែម។ ប្រភព៖ រដ្ឋាភិបាលថៃ, Department of Disaster Prevention and Mitigation (DDPM) និង The Nation Thailand។