សំណង់អគារ និងរបងរឹងមាំ សង់អំពីឥដ្ឋបេតុងលើដីចំណីស្ទឹងព្រែកត្នោតស្ថិតនៅភូមិឈើទាលក្រោម ឃុំរលាំគ្រើល ស្រុកសំរោងទង ខេត្តកំពង់ស្ពឺ ទើបតែរួចរាល់ ក្រោមខ្សែភ្នែកលោកប្រធានធនធានទឹក និងឧតុនិយម អាជ្ញាធរមូលដ្ឋាន និងប្រជាពលរដ្ឋ។ សំណង់បែបអភិជន ជាមួយការរៀបចំសួនមានស្មៅផ្កាភ្ញីខាងលើនេះត្រូវពលរដ្ឋរាយការមកជារបស់អតីតថៅកែរណ្ដៅបូមខ្សាច់នៅតំបន់នោះ មិនត្រឹមតែសង់លើចំណីស្ទឹងទេ តែនៅកៀកនឹងទ្វារទឹក និងទំនប់បង្ហៀរផងទៀត ដែលជាទីតាំងកម្រមានសំណង់ថ្មីរូបរាងបែបនេះកើតមាន។
ទាក់ទងការលើកឡើងនេះ ម្ចាស់សំណង់ឈ្មោះ សៃ 1Post មិនទាន់អាចទំនាក់ទំនងសុំការបញ្ជាក់បានទេ។ ចំណែកលោក ញ៉ាញ់ ជាបហង ប្រធានមន្ទីរធនធានទឹក និងឧតុនិយម ខេត្តកំពង់ស្ពឺ បានឱ្យ 1Post ដឹងថា ករណីនេះលោកដឹងយូរហើយនឹងចុះពិនិត្យមិនឱ្យរួចខ្លួនទេ គ្រាដែលការសាងសង់នោះធ្វើឡើងរាប់ខែបានយ៉ាងរលូន និងរួចរាល់ទៅហើយ។ សម្លេង
លោកក៏បានលើកឡើងផងដែរលើកណីស្រដៀងគ្នានេះទៀតថា បច្ចុប្បន្នអាជ្ញាធរខេត្ត និងមន្ទីរជំនាញកំពុងគ្រោងរំដោះចំណីស្ទឹង រៀបចំសណ្ដាប់ធ្នាប់ កែលម្អសោភ័ណ្ឌភាព។ ទន្ទឹងនឹងការរបស់លោកលើកឡើងដូចនេះនៅចំណុចអតីតផ្សារត្រីក្នុងក្រុងច្បារមនឃើញថាធ្វើបានសម្រេច។ តែនៅឯទីតាំងមួយចំនួនក្នុងឃុំត្រពាំងគង និងឃុំវល្លរ៍ស ការចាក់ដី និងសង់សំណង់លើចំណីស្ទឹងកំពុងធ្វើទៅបាន។
លោក មុត ភន អភិបាលស្រុកសំរោងទង មិនទាន់មានការបញ្ជាក់ទេក្រោយសាកសួរតាំងពីថ្ងៃទី២៥ កុម្ភះ ឆ្នាំ២០២៥ រហូតមកដល់វេលាចេញផ្សាយនេះ។
ដោយឡែកប្រភព 1Post ទទួលបានករណីសំណង់បំពានច្បាប់របស់លោកសៃ មានទាំងដីការរបស់តុលាការឱ្យរុះរើផងទៀត តែមិនឃើញអនុវត្តន៍បានសម្រេចនៅឡើយខណៈសង្គមជាតិកំពុងរៀបរយសណ្ដាប់ធ្នាប់ឱ្យមានរបៀបឡើងវិញ ពិសេសសំណង់កើតឡើងក្នុងរង្វង់រយៈពេលប៉ុន្មានចុងក្រោយនេះដែលប្រព្រឹត្តដោយអ្នកមានលទ្ធិភាព មានប្រាក់ចាក់បំពេញដី និងសាងសង់តាមចិត្តចង់តែផ្ទុយពីច្បាប់។
សូមរម្លឹកថា កាលពីថ្ងៃទី២៩ សីហា ឆ្នាំ២០២៤ ក្រសួងធនធានទឹក និងឧតុនិយម បានប្រាប់ជាពិសេសដល់រដ្ឋបាលខេត្តកណ្ដាល កំពង់ស្ពឺ និងភ្នំពេញ ឱ្យចាត់វិធានការតាមផ្លូវច្បាប់លើជនដែលនៅតែបន្តសកម្មភាពរំលោភប៉ះពាល់ដល់ទ្រព្យសម្បត្តិសាធារណៈរបស់រដ្ឋ បន្ទាប់ពីក្រសួងសង្កេតឃើញថា មានសកម្មភាពរំលោភបំពានតាមបណ្តោយដងស្ទឹងព្រែកត្នោត ដូចជាការចាក់ដីរំលោភចូលស្ទឹង ការរំលោភកាន់កាប់មាត់ច្រាំងស្ទឹង និងការរំលោភចូលដីចំណីស្ទឹង។ តើរហូតមកដល់ពេលពេលនេះរដ្ឋបាលខេត្តកំពង់ស្ពឺ ចាត់វិធានការតាមនីតិវិធីលើជនបំពាននោះបានប៉ុន្មានករណីហើយ? វីដេអូ៖ https://www.facebook.com/share/v/1H4puu3Jqp/?mibextid=wwXIfr
