ធ្លាយព័ត៌មានសន្តិសុខដ៏ធំមួយ ដែលមន្ត្រីជាន់ខ្ពស់មកពីរដ្ឋបាលលោក ដូណាល់ ត្រាំ បានច្រឡំដៃ Add លោក Jeffrey Goldberg និពន្ធនាយកនៃទស្សនាវដ្តី The Atlantic ទៅក្នុង Group Chat កម្មវិធី Signal ដោយក្នុង Group នោះ ពួកគេបានពិភាក្សាគ្នាអំពីផែនការយោធាដ៏រសើបបំផុតសម្រាប់ការវាយតាមអាកាសប្រឆាំងនឹងក្រុមសកម្មប្រយុទ្ធហ៊ូធី ដែលគាំទ្រដោយអ៊ីរ៉ង់នៅប្រទេសយេម៉ែន។
រឿងសម្ងាត់នោះគឺការពិភាក្សាគ្នាលើព័ត៌មានលម្អិតប្រតិបត្តិការដូចជាគោលដៅអាវុធ និងពេលវេលានៃការវាយប្រហារជាដើម។ក្រោយមកក្រុមប្រឹក្សាសន្តិសុខជាតិអាមេរិកបានបញ្ជាក់ថា ព័ត៌មានពិតជាលេចធ្លាយមែន ហើយកំពុងស៊ើបអង្កេតថាតើ លោក Goldberg ត្រូវបាន Add ចូលទៅក្នុង Chat នេះដោយរបៀបណា ខណៈលោកប្រធានាធិបតី ត្រាំ អះអាងថា លោកមិនដឹងអ្វីទេ។
គួររម្លឹកថា ការបែកធ្លាយនេះកើតឡើងត្រឹមមួយថ្ងៃប៉ុណ្ណោះបន្ទាប់ពី សហរដ្ឋអាមេរិកបានទម្លាក់គ្រាប់បែកលើបន្ទាយក្រុមឧទ្ទាមហ៊ូធី ក្នុងរដ្ឋធានីសាណា នៃប្រទេសយេម៉ែន ដោយបណ្តាលឲ្យមនុស្សម្នាក់ស្លាប់និងរាប់សិបនាក់ទៀតរងរបួស ហើយថែមទាំងបំផ្លាញហេដ្ឋារចនាសម្ព័ន្ធសំខាន់ៗមួយចំនួនផងទៀត៕
