ព្រះសង្ឃទាំង២អង្គបានវាយតប់គ្នាចំមុខ គ្រាដែលព្រះសង្ឃផ្សេងទៀតនិងអ្នកភូមិកំពុងធ្វើពិធីឧទ្ទិសកុសលដល់វិញ្ញាណក្ខន្ធអ្នកស្លាប់ក្នុងឱកាសបុណ្យសង្ក្រាន្ត នៅក្បែរកុដិក្នុងវត្ត Pho Sri Sawang Arom កាលពីវេលាម៉ោង ១ រសៀល ថ្ងៃទី១៤ ខែមេសា ឆ្នាំ២០២៣ ធ្វើឱ្យមហាជនជាច្រើនកើតឆ្ងល់ចង់ដឹងពីមូលហេតុនៃការឈ្លោះប្រកែករវាងព្រះសង្ឃ។ វីដេអូ https://www.facebook.com/watch/?v=965038451176348&mibextid=cr9u03
ព្រះសង្ឃ Phra Korapaphon ជាព្រះចៅអធិការវត្តភូស្រីស្វាងអារម្មណ៍ ស្ថិតនៅក្នុងឃុំចោមប្រា ស្រុកចោមប្រា ខេត្តសុរិន្ទ ប្រទេសថៃ បានមានសង្ឃដីការថា អាត្មាត្រូវញោមញាតិនិមន្តទៅធ្វើបុណ្យឧទ្ទិសកុសលដល់វិញ្ញាណក្ខន្ធអ្នកស្លាប់នៅខាងចេតិយតម្កល់ធាតុអ្នកស្លាប់ អាត្មាមិនដឹងថាតើព្រះសង្ឃទាំង២អង្គនេះមានបញ្ហាឬក៏រឿងអ្វីនោះទេពីមុនមក ព្រោះអាត្មាអង្គុយនៅកៅអីជួរមុខ ហើយឃើញព្រះសង្ឃទាំងពីរអង្គវាយគ្នាក៏ចូលទៅសួរនាំ។
បន្ទាប់ពីវាយតប់គ្នាពុទ្ធបរិស័ទនៅស្រុកចោមប្រាជាច្រើនបានទូរស័ព្ទទៅសួរថា តើហេតុអ្វីបានវាយតប់គ្នា? ដូច្នេះអាត្មាកំពុងប្រឹក្សាជាមួយគណៈកម្មាធិការចំណុះជើងវត្តដើម្បីស្វែងរកមូលហេតុនេះ គ្រាដែលមានជម្លោះនោះមានអ្នកភូមិ សាច់ញាតិ និងព្រះសង្ឃដែលនៅកន្លែងកើតហេតុបានព្យាយាមឃាត់កុំឱ្យមានជម្លោះ។
ទោះយ៉ាងណាមិនមានការប្ដឹងគ្នាទេព្រោះម្ដាយរបស់ព្រះសង្ឃដែលវាយចាញ់ព្រះសង្ឃ១អង្គទៀតនោះបានហាមឃាត់មិនចង់ឱ្យប្ដឹងនោះទេ ព្រោះមិនចង់ឱ្យមានកម្មជាអកុសលបន្តទៀត។ហើយព្រះសង្ឃដៃដល់ក៏គេចព្រះកាយចេញពីវត្តក្រោយកើតហេតុបាន១ថ្ងៃ។
បើតាមព្រះសង្ឃដែលរងគ្រោះដោយការវាយបានមានសង្ឃដីការឱ្យដឹងថា មុនពេលកើតហេតុព្រះអង្គត្រូវបាននិមន្តទៅធ្វើពិធីសូត្រមន្តដោយញោមញាតិរៀបចំតុនិងកៅអីសម្រាប់ព្រះសង្ឃគង់និងធ្វើពិធី ពេលនោះកៅអីខាងក្រោយពេញ ហើយអាសនៈខាងមុខមាន៣កន្លែងនៅទំនេរទើបព្រះអង្គនិមន្តទៅគង់គ្រានោះព្រះសង្ឃ១អង្គផ្សេងទៀតសង្ស័យជាក្រុមសង្ឃដៃដល់ក៏សួរថា បួសបានប៉ុន្មានឆ្នាំបានគង់នៅខាងមុខ? ស្រាប់តែព្រះសង្ឃដៃដល់ស្ទុះមកដាល់អាត្មាមុន ហើយអាត្មាក៏តដៃវិញប៉ុន្តែមិនអាចតទល់នឹងកម្លាំងរបស់ព្រះសង្ឃនោះទេ ក្រោយមកក៏មានការជួយឃាត់បំបែកដែលទំនងជាខ្ញាល់រឿងគង់កៅអីជួរមុខសម្រាប់ថ្នាក់ដឹកនាំសង្ឃ។
ប្រភពផ្សេងទៀតបានឱ្យដឹងថា បានឃើញព្រះអង្គដៃដល់លើកកៅអីទៅវាយសង្ឃរងគ្រោះ ប៉ុន្តែព្រះសង្ឃផ្សេងទៀត និងអ្នកភូមិឃើញទាន់ក៏បានឆក់យកកៅអីជ័រនោះចេញហើយក៏នៅតែសម្រុកទៅវាយនឹងដៃទៀត៕
