នាយករដ្ឋមន្ត្រីអេស្ប៉ាញបាននិយាយថា មនុស្សជាង 500 នាក់បានស្លាប់ក្នុងអំឡុងពេលរលកកំដៅរយៈពេល 10 ថ្ងៃ ខណៈដែលអឺរ៉ុប ពុំដែលជួបនៅសីតុណ្ហភាពដែលអាក្រក់ខ្លាំងបែបនេះកន្លងមក។
អ្នកជំនាញឃ្លាំមើលការប្រែប្រួលអាកាសធាតុបាននិយាយថា អាកាសធាតុក្ដៅគួរជាការដាស់តឿនដល់ទ្វីបនេះ។
នាយករដ្ឋមន្ត្រីអេស្បាញលោក Pedro Sanchez បាននិយាយថា "នេះមិនទាក់ទងនឹងមនោគមវិជ្ជាទេ ប៉ុន្តែជាការពិត ជាមួយនឹងភាពអាសន្នអាកាសធាតុ ដែលភពផែនដីកំពុងរស់នៅ" ។
ដោយនិយាយមិនសម្ដៅតែដើមឈើឆេះ និងដីដែលឆេះនៅក្នុងតំបន់ Zaragoza ភាគឦសានដែលរងគ្រោះខ្លាំងនោះ លោកបានជំរុញឱ្យប្រជាជនបង្កើន "ការប្រុងប្រយ័ត្នបំផុត" ។
Sanchez បានលើកឡើងពីតួលេខដែលចេញផ្សាយដោយវិទ្យាស្ថានសុខភាព Carlos III ដែលប៉ាន់ប្រមាណចំនួនអ្នកស្លាប់ដោយសារកំដៅ ដោយផ្អែកលើចំនួនអ្នកស្លាប់លើសបើធៀបនឹងមធ្យមភាគកាលពីឆ្នាំមុន។
វិទ្យាស្ថានបានសង្កត់ធ្ងន់ថាតួលេខទាំងនេះគឺជាការប៉ាន់ប្រមាណតាមស្ថិតិ និងមិនមែនជាកំណត់ត្រាផ្លូវការទេ។
មន្ត្រីម្នាក់បាននិយាយថា ក្នុងពេលជាមួយគ្នានេះ ក្រុមអ្នកពន្លត់អគ្គីភ័យក្រិកទទួលបានភាពខ្លាំងនៅក្នុងការប្រយុទ្ធប្រឆាំងនឹងភ្លើងឆេះព្រៃដែលឆេះរយៈពេលពីរថ្ងៃនៅតំបន់ជាយក្រុងតាមភ្នំភាគខាងជើងនៃទីក្រុងអាថែន ដែលបានបង្ខំមនុស្សរាប់រយនាក់ឱ្យភៀសខ្លួន។
អ្នកនាំពាក្យនាយកដ្ឋានពន្លត់អគ្គីភ័យ លោក Yiannis Artopios បានប្រាប់អ្នកយកព័ត៌មានថា"សម្រាប់ផ្នែកភាគច្រើន ភ្លើងកំពុងធ្លាក់ចុះ" ។
ប្រទេសក្រិចបានរួចផុតពីរលកកំដៅដែលកំពុងកើតមាននៅអឺរ៉ុបខាងលិច ប៉ុន្តែអណ្តាតភ្លើងដែលឆាបឆេះដោយខ្យល់បក់ខ្លាំងកំពុងគំរាមកំហែងតំបន់ជាយក្រុង Penteli, Pallini, Anthousa និងGerakas ដែលជាផ្ទះសម្រាប់មនុស្សរាប់ម៉ឺននាក់។
“ភ្លើងបានឆាបឆេះនៅក្បែរយើង តែយើងបានចាកចេញទៅទាន់ពេល។ ប្រសិនបើយើងស្នាក់នៅ 30 វិនាទីទៀត វានឹងឆេះយើង” នេះបើតាមអ្នកស្រុក Pallini ដែលបានបាត់បង់រថយន្តរបស់គាត់ដោយអណ្តាតភ្លើងនិយាយប្រាប់ទូរទស្សន៍ ERT៕
