ខេត្តកណ្ដាល៖ សេចក្ដីរាយការបានឱ្យដឹងថា ក្រុមរថយន្តដឹកដី និងខ្សាច់ ល្មើសបច្ចេកទេស (គ្មានស្លាកលេខ តទ្រុង ផ្ទុកលើសទ្រុង ធ្លាក់លើផ្លូវ) នៅតែដឹកឆ្លងកាត់ជញ្ជីងទៅមុខបានយ៉ាងរលូននៅចំណុចភូមិសៀមរាប ឃុំជើងកែប ស្រុកកណ្ដាលស្ទឹង ខេត្តកណ្ដាល តាមបណ្ដោយផ្លូវជាតិលេខ២។
សេចក្ដីរាយការបានបន្តឱ្យដឹងទៀតថា ក្នុងមួយថ្ងៃៗរថយន្តដឹកប្រភេទនេះរាប់រយគ្រឿង ដឹកដី និងខ្សាច់ចូលភូមិសាស្ត្រ រាជធានីភ្នំពេញ ធ្វើអោយដី និងខ្សាច់ធ្លាក់លើផ្លូវ បង្កជាធូលីហុយ ប៉ះពាល់ដល់បរិស្ថាន សុខភាព សុវត្ថិភាព រំខានដល់ជីវភាព និងការធ្វើដំណើរ។
ទាក់ទងនឹងការលើកឡើងនេះនៅថ្ងៃទី២២ ខែធ្នូ ឆ្នាំ២០២០ លោក ម៉ឹង យូឡេង ប្រធានមន្ទីរសាធារណៈការ និងដឹកជញ្ជូន ខេត្តកណ្ដាល បានឱ្យអ្នកសារព័ត៌មានដឹងថា លោកនឹងពិនិត្យមើលនៅចំណុចស្ថានីយ៍ជញ្ជីងថ្លឹងខាងឡើងវិញ ថាការពិតយ៉ាងណា។
សូមរំលឹកផងដែរថា ក្រសួងរ៉ែ និងថាមពល កន្លងទៅសហការជាមួយអន្តរក្រសួងដែលពាក់ព័ន្ធ បានចេញសារាចរណ៍ណែនាំកំណត់ថា ការដឹកជញ្ជូនដីឬខ្សាច់ត្រូវតែស្ងួតមិនលើសទ្រុង មិនលើសទម្ងន់ គ្របអោយជិត មិនត្រូវធ្វើឱ្យដី និងខ្សាច់ធ្លាក់លើផ្លូវ មិនត្រូវធ្វើឱ្យប៉ះពាល់ដល់បរិស្ថាន សណ្ដាប់ធ្នាប់ និងផលប្រយោជន៍សាធារណៈ ពិសេសត្រូវគោរពបទដ្ឋានបច្ចេកទេស៕
