លោកបណ្ឌិត សុខ ទូច ប្រធានរាជបណ្ឌិតសភាកម្ពុជា នៅថ្ងៃ២៨ មេសា ឆ្នាំ២០២២ បានសរសេរលើគណនីហ្វេសបុកផ្លូវការរបស់លោកថា៖ ហេតុអ្វីមិនគ្របនៅពេលដឹកដីខ្សាច់ ដី ថ្មកិន តើបុរសពួននៅឯណា?
« 1. ប៉ះពាល់ដល់អ្នកធ្វើដំណើរតាមផ្លូវ
2. ប៉ះពាល់ដល់បរិស្ថាន
3. ប៉ះពាល់អ្នករស់នៅតាមដងផ្លូវ និងអ្នកធ្វើអាជីវកម្មតាមដងផ្លូវ
4. ឈានទៅដល់គ្រោះថ្នាក់ អាចបណ្ដាលឱ្យពិការ ឬស្លាប់បាន នៅពេលយកដៃមកជូតមុខ ឬខ្ទាតចូលភ្នែក។
5. បើបើករថយន្តមិនពាក់ខ្សែក្រវាត់ ប្រុសពួនមើលឃើញ។»
ទាក់ទងការលើកឡើងនេះលោក សាន សុខសីហា អ្នកនាំពាក្យស្នងការនគរបាលរាជធានីភ្នំពេញបានប្រាប់ 1Post ថា ការលើកឡើងរបស់គាត់គួរបញ្ជាក់ឱ្យច្បាស់លាស់ការដឹកនឹងនៅតំបន់ណា។ធម្មតាប្រទេសណា ទីក្រុងណាក៏មានការអភិវឌ្ឍន៍ដែរ ដឹកនៅតំបន់ណាកន្លែងណា ពេលខ្លះអាចដឹងនៅកៀកនឹងតំបន់អភិវឌ្ឍន៍ថ្មី ប៉ុន្តែជាទូទៅសមត្ថកិច្ចតែងតែចុះធ្វើការអប់រំណែនាំប្រចាំមានការគ្របឱ្យច្បាស់លាស់ ក្នុងនាមយើងសមត្ថកិច្ចអត់ដែលគាំទ្រលើការដឹកអ៊ីចឹងដែរ យើងធ្វើការអប់រំជាប្រចាំដែរ។ ហើយរថយន្តមួយចំនួនក៏ទទួលបានផាកពិន័យដែរ។ តែយើងក៏ត្រូវការឱ្យដឹងច្បាស់ទីតាំងកន្លែងណាៗ ខ្លះជាកន្លែងអភិវឌ្ឍន៍ យើងឃើញហើយជុំវិញទីក្រុងយើង ដូចជាតំបន់កប់ស្រូវ ផ្លូវឧកញ៉ាលីយ៉ុងផាត់ និងប៉ែកខាងដង្កោសុទ្ធតែជាតំបន់អភិវឌ្ឍន៍ដែលរដ្ឋបាលរាជធានីភ្នំពេញក៏ដូចជារដ្ឋាភិបាលធ្វើការពង្រីកទីក្រុងក្នុងរយៈពេលប៉ុន្មានឆ្នាំចុងក្រោយនេះលឿនមែនទែន។
ទោះយ៉ាងនេះក្ដីមតិពលរដ្ឋបានលើកឡើងថា បើនគរបាលចរាចរណ៍ធ្វើការឱ្យហ្មត់ចត់ពិនិត្យជាប្រចាំនៅចំណុចគោលដៅដូចរៀបរាប់ខាងលើ ម្លេះគ្មានសកម្មភាពល្មើសកើតឡើងបែបនេះទេ ក្រែងតែរវល់អ្វីផ្សេងក្រៅពីនោះ។ ដែលនាំឱ្យកើតឆ្ងល់ថា ហេតុអ្វីមិនដាក់កម្លាំងឱ្យដូចនគរបាលចរាចរណ៍ឈរជើងចាំផាកពិន័យជាប្រចាំនៅតាមបណ្ដាផ្លូវជាច្រើនក្នុងរាជធានីភ្នំពេញនោះ៕
