ភ្នំពេញ៖ ក្រសួងសារធារណៈការ និងដឹកជញ្ជូន កាលពីថ្ងៃទី២៩ មករា ឆ្នាំ២០២២ បានឱ្យថារាជរដ្ឋាភិបាលគ្រោងធ្វេីការតភ្ជាប់ការដឹកជញ្ជួនតាមផ្លូវទឹកពីទន្លេបាសាក់ ទៅកាន់សមុទ្រខេត្តកែបផ្ទាល់ ដោយមិនចាំបាច់ឆ្លងកាត់ប្រទេសវៀតណាម។
គម្រោងនេះត្រូវបានសិក្សារួចរាល់ហើយ។ ដោយបានពិភាក្សាទិដ្ឋភាពផ្លូវច្បាប់នានាជាមួយក្រសួងធនធានទឹកពាក់ព័ន្ធច្បាប់ទន្លេមេគង្គ ហើយក៏មិនមានបញ្ហាអ្វីនោះដែរ។
លោក ស៊ុន ចាន់ថុល រដ្ឋមន្ត្រីក្រសួងសាធារណៈការ និងដឹកជញ្ជូន បានឱ្យដឹងថា ការតភ្ជាប់នេះ គឺប្រើផ្លូវទឹកធម្មជាតិដែលមានស្រាប់ ហើយមានការជីកផ្លូវទឹកថ្មីភ្ជាប់ទៅសមុទ្រចម្ងាយប្រមាណជា៥គីឡូម៉ែត្រ។ បើទោះបីជាយ៉ាងណាការតភ្ជាប់នេះស្ថិតនៅក្នុងការសិក្សានៅឡើយ។ តែសម្រាប់លោកទេសរដ្ឋមន្ត្រី ចង់ឃើញបណ្តាញផ្លូវទឹកនេះលេចចេញជារូបរាង ព្រោះវាផ្តល់ផលចំណេញច្រើនសម្រាប់ការដឹកជញ្ជូនរបស់កម្ពុជា។
សូមរំលឹកថា ប្រសិនគម្រោងនេះជោគជ័យ នឹងធ្វើការតភ្ជាប់ខ្សែដឹកជញ្ជូនតាមផ្លូវទឹកពីកំពង់ផែទឹកសាបទៅកំពង់ផែទឹកប្រៃដោយផ្ទាល់តែម្ដងដោយមិនចាំបាច់ឆ្លងកាត់នីតិវិធីដែលមានសព្វថ្ងៃនៅច្រកទ្វារអន្តរជាតិក្អមសំណឆ្លងកាត់វៀតណាម និងចំណេញការធ្វើដំណើរប្រហែល៨០គីឡូម៉ែត្រ៕
