សារព័ត៌មាន The New York Times បានរាយការណ៍ថា រដ្ឋបាលរបស់ប្រធានាធិបតីអាមេរិក លោក ដូណាល់ ត្រាំ កំពុងពិចារណាដាក់ចេញការហាមឃាត់ការធ្វើដំណើរថ្មីមួយ ដែលនឹងប៉ះពាល់ដល់ពលរដ្ឋមកពីប្រទេសចំនួន ៤៣ នៅទូទាំងពិភពលោក ក្នុងនោះក៏មានកម្ពុជាយើងផងដែរ។
គម្រោងនៃផែនការគឺបានចែកប្រទេសទាំងនេះជា ៣ កម្រិត ដោយផ្អែកលើហានិភ័យសន្តិសុខដែលរដ្ឋាភិបាលអាមេរិកយល់ឃើញ។ ការសម្រេចចិត្តនេះធ្វើឡើងបន្ទាប់ពីលោក ត្រាំ បានចុះហត្ថលេខាលើបទបញ្ជាប្រតិបត្តិមួយកាលពីថ្ងៃទី ២០ មករា ឆ្នាំ២០២៥ ដែលបញ្ជាឱ្យសមាជិកគណៈរដ្ឋមន្ត្រីរបស់លោករៀបចំបញ្ជីប្រទេសដែលគួរតែត្រូវបានហាមឃាត់ផ្នែកខ្លះ ឬទាំងស្រុង ដោយសារតែ "ព័ត៌មានសម្រាប់ការត្រួតពិនិត្យ និងវាយតម្លៃមានកម្រិតខ្សោយ"។
ការធ្វើដូចនេះត្រូវបានគេមើលឃើញថាជាការពង្រីកវិសាលភាពនៃការហាមឃាត់ការធ្វើដំណើរពីអាណត្តិទីមួយរបស់លោក ត្រាំ ដែលធ្លាប់បានហាមឃាត់ប្រទេសចំនួន ៧ ដែលភាគច្រើនជាប្រទេសមូស្លីម។ មន្ត្រីអាមេរិកម្នាក់ដែលនិយាយក្នុងលក្ខខណ្ឌអនាមិកថា បញ្ជីនេះត្រូវបានរៀបចំឡើងតាំងពីប៉ុន្មានសប្តាហ៍មុន ប៉ុន្តែវានៅអាចមានការផ្លាស់ប្តូរបាន ហើយមិនទាន់ត្រូវបានអនុម័តជាផ្លូវការដោយរដ្ឋបាល ត្រាំ រួមទាំងរដ្ឋមន្ត្រីការបរទេស លោក ម៉ាកូ រូប៊ីអូ (Marco Rubio) នៅឡើយទេ។
ការស្នើឡើងនេះបានធ្វើឱ្យមានការភ្ញាក់ផ្អើល ជាពិសេសចំពោះប្រទេសមួយចំនួនដូចជា ភូតាន ដែលជាប្រទេសតូចមួយដែលមានសន្តិភាព និងមិនសូវមានបញ្ហាសន្តិសុខជាក់ស្តែង។ អ្នកជំនាញខ្លះបានលើកឡើងថា ការដាក់បញ្ចូលប្រទេសនេះអាចទាក់ទងនឹងការព្រួយបារម្ភអំពីការផ្ទៀងផ្ទាត់អត្តសញ្ញាណ ដែលធ្លាប់មានករណីនៅឆ្នាំ២០២៣ នៅប្រទេសនេប៉ាល់ ដែលជនជាតិនេប៉ាល់បានក្លែងខ្លួនជាជនភៀសខ្លួនភូតានដើម្បីចូលអាមេរិក។
ការហាមឃាត់នេះនឹងជាផ្នែកមួយនៃការបង្កើនការត្រួតពិនិត្យលើអន្តោប្រវេសន៍របស់លោក ត្រាំ ដែលលោកបានសន្យាក្នុងយុទ្ធនាការឃោសនារបស់លោក។ ទោះជាយ៉ាងណា វានៅមិនទាន់ច្បាស់ថា តើការហាមឃាត់នេះនឹងប៉ះពាល់ដល់អ្នកដែលមានទិដ្ឋាការសហរដ្ឋអាមេរិករួចហើយ ឬគ្រាន់តែអនុវត្តចំពោះទិដ្ឋាការថ្មីប៉ុណ្ណោះ។ ការសម្រេចចិត្តចុងក្រោយត្រូវគេរំពឹងថានឹងប្រកាសនៅថ្ងៃទី ២១ ខែមីនា ឆ្នាំ២០២៥ ដែលជាពេលផុតកំណត់នៃបទបញ្ជាប្រតិបត្តិ៕
