សេចក្តីរាយការណ៍របស់ទីភ្នាក់ងារសារព័ត៌មាន AP បានឱ្យដឹងថា តំណាងរាស្ត្រពីរនាក់ដែលមកពីគណបក្សទាំងពីរនៅក្នុងរដ្ឋសភាសហរដ្ឋអាមេរិក កំពុងស្នើឱ្យមានបម្រាបមិនឱ្យប្រើកម្មវិធី app បញ្ញាសិប្បនិម្មិត AI របស់ចិនឈ្មោះ DeepSeek ពីឧបករណ៍នានារបស់រដ្ឋាភិបាលសហរដ្ឋអាមេរិក ដែលបម្រាមនេះស្រដៀងគ្នានឹងបម្រាមដែលមានស្រាប់ចំពោះកម្មវិធី app បណ្តាញសង្គមដ៏មានប្រជាប្រិយភាពគឺ TikTok។
លោក Josh Gottheimer តំណាងរាស្ត្រគណបក្សប្រជាធិបតេយ្យពីរដ្ឋ New Jersey និងលោក Darin LaHood តំណាងរាស្ត្រគណបក្សសាធារណរដ្ឋមកពីរដ្ឋ Illinois កាលពីថ្ងៃព្រហស្បតិ៍បានបង្ហាញសេចក្តីព្រាងនៃ«ច្បាប់ហាម DeepSeek នៅក្នុងឧបករណ៍រដ្ឋាភិបាល» ដែលនឹងហាមឃាត់មន្ត្រីរដ្ឋការសហរដ្ឋអាមេរិក ពីការប្រើប្រាស់កម្មវិធី app AI របស់ចិននេះ នៅលើឧបករណ៍របស់រដ្ឋាភិបាលអាមេរិក។ ពួកគេបានលើកឡើងវិញលទ្ធភាពដែលរដ្ឋាភិបាលចិនអាចប្រើ app នេះ ដើម្បីឈ្លបយកការណ៍និងការផ្សាយព័ត៌មានមិនពិត ថាជាមូលហេតុនៃបម្រាមនេះ។
មូលហេតុនៃបម្រាមគឺពួកគេយល់ឃើញថា “គណបក្សកុម្មុយនីស្តចិនបានកេងចំណេញពី ឧបករណ៍ណាដែលខ្លួនមាន ដើម្បីធ្វើឱ្យខ្សោយដល់សន្តិសុខជាតិគេ បញ្ចេញព័ត៌មានមិនពិតដែលមានគ្រោះថ្នាក់ និងប្រមូលទិន្នន័យពីពលរដ្ឋអាមេរិក។ យើងមិនអាចប្រថុយឱ្យគណបក្សកុម្មុយនីស្តចិនចូលក្នុងឧបករណ៍រដ្ឋាភិបាល និងធ្វើឱ្យគ្រោះថ្នាក់ដល់ សន្តិសុខជាតិយើងទេ”៕
