ចិនបោះផ្សាយលក់មូលបត្របំណុលច្រើនបំផុតពុំធ្លាប់មាន ដើម្បីទប់សេដ្ឋកិច្ចរបស់ខ្លួននៅឆ្នាំ២០២៥

សារព័ត៌មានអន្តរជាតិជាច្រើនបានផ្សាយថា រដ្ឋាភិបាលចិនបានព្រមព្រៀងបោះផ្សាយលក់សញ្ញាបណ្ណ ឬមូលបត្របំណុលក្នុងទំហំច្រើនបំផុតមិនធ្លាប់មានរហូតដល់ទៅ ៤១១ពាន់លានដុល្លារអាម៉េរិនៅឆ្នាំ២០២៥ ខាងមុខ ដែលនេះគឺជាផ្នែកមួយនៃកិច្ចខិតខំប្រឹងប្រែងបង្កើនវិធានការសារពើពន្ធ ដើម្បីស្តារសេដ្ឋកិច្ចរបស់ខ្លួនដែលកំពុងធ្លាក់ចុះយ៉ាងគំហុក។

ផែនការបោះផ្សាយលក់មូលបត្របំណុលឆ្នាំ២០២៥ នេះ គឺកើនឡើងយ៉ាងខ្លាំងបើធៀបនឹងការបោះផ្សាយលក់មូលបត្របំណុលក្នុងឆ្នាំ២០២៤ ដែលមានត្រឹមតែ១៣៧ពាន់លានដុល្លារអាម៉េរិក ខណៈដែលទីក្រុងប៉េកាំង បានត្រៀមលក្ខណៈទប់ទល់ផលប៉ះពាល់ដែលអាចកើតមានដោយសារការដំឡើងពន្ធរបស់សហរដ្ឋអាម៉េរិក លើទំនិញនាំចូលរបស់ចិន នៅពេលដែលលោក ដូណាល់ ត្រាំ ចូលកាន់តំណែងជាប្រធានាធិបតីជាផ្លូវការនៅខែមករា ឆ្នាំ២០២៥។

ទឹកប្រាក់ដ៏ច្រើនសន្ធឹកសន្ធាប់ដែលប្រមូលបានពីការបោះផ្សាយលក់មូលបត្របំណុលនេះ នឹងត្រូវយកទៅប្រើប្រាស់ ដើម្បីជំរុញតម្រូវការក្នុងទីផ្សារតាមរយៈកម្មវិធីឧបត្ថម្ភធន ជួយក្រុមហ៊ុនសហគ្រាសនានាធ្វើទំនើបកម្មឧបករណ៍ គ្រឿងចក្រ ឬបច្ចេកវិទ្យារបស់ខ្លួន និងជួយគាំទ្រផ្ដល់ហិរញ្ញប្បទានដល់ការវិនិយោគក្នុងវិស័យនវានុវត្តន៍ថ្មី។

ឆ្លើយតបនឹងការចុះផ្សាយនេះការិយាល័យព័ត៌មានក្រុមប្រឹក្សារដ្ឋចិន (SCIO) ដែលជាអ្នកឆ្លើយរាល់សំណួររបស់ប្រព័ន្ធផ្សព្វផ្សាយឱ្យរដ្ឋាភិបាលចិន មិនបានឆ្លើយតបនឹងសំណួររបស់ទីភ្នាក់ងារព័ត៌មាន រ៉យទ័រ ដែលបានសុំការបំភ្លឺជុំវិញបញ្ហារឿងនេះទេ។

បើតាមលោក ថមមី ស៊ា (Tommy Xie) ប្រធានផ្នែកសិក្សាស្រាវជ្រាវពីស្ថានភាពសេដ្ឋកិច្ចអាស៊ី នៅធនាគារសិង្ហបុរី OCBC Bank បានកត់សម្គាល់ថា ផែនការបោះផ្សាយលក់មូលបត្របំណុលរបស់រដ្ឋាភិបាលចិននេះ គឺពិតជាមានទំហំធំខ្លាំងណាស់ ដែលលើសពីការរំពឹងទុករបស់ទីផ្សារទៅទៀត៕