ក្រោយពីការដួលរលំរបបដឹកនាំរបស់លោកប្រធានាធិបតី Assad ក្នុងប្រទេសស៊ីរីមក អង្គការសហប្រជាជាតិបានទទូចកាលពីថ្ងៃចន្ទថា ការទទួលខុសត្រូវរបស់លោកAssad និងអ្នកផ្សេងទៀតត្រូវតែមានចំពោះឧក្រិដ្ឋកម្មដ៏គួរឲ្យរន្ធត់ដែលបានប្រព្រឹត្តឡើងក្នុងអំឡុងពេលលោកគ្រប់គ្រងប្រទេស។ នេះបើយោងតាមសារព័ត៌មាន AFP។
ប្រធានផ្នែកសិទ្ធិមនុស្សរបស់អង្គការសហប្រជាជាតិលោក Volker Turk បានសង្កត់ធ្ងន់អំពីតម្រូវការក្នុងការធានានូវយុត្តិធម៌ បន្ទាប់ពីការដួលរលំរបស់របបលោក Assad។ លោក Assad ត្រូវបានបណ្តេញចេញពីអំណាចក្រោយពីការកៀបសង្កត់ដ៏ឃោរឃៅអស់រាប់ទសវត្សរ៍ក្រោមការដឹកនាំរបស់លោកនិងក្រោយពីមានសង្គ្រាមស៊ីវិលនៅស៊ីរីអស់ពេលជិត ១៤ ឆ្នាំកន្លងមកនេះ។
លោក Turk បានថ្លែងទៅកាន់ក្រុមអ្នកយកព័ត៌មានក្នុងទីក្រុងហ្សឺណែវនៃប្រទេសស្វីសថា៖ «អន្តរកាលនយោបាយណាក៏ដោយត្រូវតែធានាថាជនដៃដល់នៃការរំលោភបំពានធ្ងន់ធ្ងរត្រូវតែទទួលខុសត្រូវ និងធានាថាអ្នកទទួលខុសត្រូវទាំងនោះត្រូវតែយកមកកាត់ទោស»៕
