ខេត្តរបស់រុស្ស៊ីចំនួន ២ ប្រកាសអាសន្ន ព្រោះអ៊ុយក្រែន វាយលុកខ្លាំង

ខេត្ត Belgorod បានប្រកាសអាសន្នស្របពេលប្រតិបត្តិការវាយលុកឆ្លងដែនរបស់អ៊ុយក្រែន អូសបន្លាយពេលជាងមួយសប្តាហ៍មកហើយ។

អភិបាលខេត្ត Belgorod លោក Vyacheslav Gladkov បានបង្ហោះ Telegram ថា «ស្ថានភាពនៅ Belgorod នៅតែលំបាកនិងតានតឹងខ្លាំងណាស់ ខណៈការបាញ់ផ្លោងដោយកងកម្លាំងអ៊ុយក្រែន បានបំផ្លាញផ្ទះសម្បែង និងសម្លាប់ជនស៊ីវិលនៅទីនោះ។ ដូច្នេះ ខ្ញុំក៏សម្រេចចិត្តប្រកាសអាសន្នក្នុងតំបន់ ចាប់ពីថ្ងៃនេះតទៅ ដើម្បីការពារប្រជាជនឲ្យបានកាន់តែប្រសើរ»។

បច្ចុប្បន្នទ័ពរុស្ស៊ីនិងអ៊ុយក្រែន កំពុងប្រយុទ្ធគ្នាយ៉ាងខ្លាំងក្លាក្នុងខេត្ត Kursk ដែលមានព្រំប្រទល់ជាប់នឹង Belgorod ក្រោយពេលកងទ័ពអ៊ុយក្រែន សម្រុកចូលជាមួយរថក្រោះ និងរថពាសដែក ទៅក្នុងតំបន់នោះ កាលពីព្រឹកថ្ងៃទី៦ខែសីហា ហើយរុស្ស៊ី ក៏ប្រកាសអាសន្ននៅខេត្ត Kursk ចាប់តាំងពីថ្ងៃទី៩ខែសីហាមក៕