អគ្គនាយកដ្ឋានគយ និងរដ្ឋាករកម្ពុជា បានឱ្យដឹងថា ទំហំពានិជ្ជកម្មកម្ពុជា ជាមួយបណ្តាប្រទេសអាស៊ាន សម្រេចបានក្នុងទំហំទឹកប្រាក់ចំនួន ៦,៨២៤.១២ លានដុល្លារ ក្នុងរយៈពេល៥ខែឆ្នាំ២០២៤កើនឡើង១១.៩៦% បើធៀបរយៈពេលដូចគ្នាក្នុងឆ្នាំ២០២៣។ ក្នុងនោះទំហំទឹកប្រាក់ដែលកម្ពុជាបាននាំចេញទំនិញទៅទីផ្សារនានាក្នុងបណ្ដាប្រទេសអាស៊ានមានចំនួន ២,៤៥៩.២០ លានដុល្លារនិងនាំចូលមកវិញក្នុងទឹកប្រាក់ចំនួន ៤,៣៦៤.៩២ លានដុល្លារ។
របាយការណ៍បានបង្ហាញថា ក្នុងចំណោមបណ្ដាប្រទេសក្នុងអាស៊ាន កម្ពុជាបាននាំចេញទៅកាន់ទីផ្សារប្រទេសវៀតណាមបានច្រើនជាងគេគឺស្ថិតក្នុងទឹកប្រាក់ចំនួន ១,៨៨៧.៥២ លានដុល្លារ កើនឡើងចំនួន ២៣.៩៥% បើធៀបរយៈពេលដូចគ្នាក្នុងឆ្នាំ២០២៣ ខណៈកម្ពុជានាំចូលទំនិញពីវៀតណាមវិញស្ថិតក្នុងទឹកប្រាក់ចំនួន ១,៦៧០.៦៣ លានដុល្លារ កើនឡើងចំនួន ៨,០១% បើធៀបរយៈពេលដូចគ្នាក្នុងឆ្នាំ២០២៣។
ក្រៅពីនេះ ប្រទេសថៃស្ថិតនៅលំដាប់ទី២ជាប្រទេសដែលកម្ពុជាបាននាំចេញទំនិញទៅច្រើន គឺស្ថិតក្នុងទំហំទឹកប្រាក់ចំនួន ៣៩១.៧១ លានដុល្លារ បន្ទាប់មកមានប្រទេសម៉ាឡេស៊ី ៥៤.៣៩ លានដុល្លារ, ឥណ្ឌូណេស៊ី ៤៨.៨៣ លានដុល្លារ, សិង្ហបុរី ៤៨.៦៧ លានដុល្លារ, ហ្វីលីពីន ១៩.៧២ លានដុល្លារ, ឡាវ ៥.៥០ លានដុល្លារ, ប្រុយណេ ២.៤៩ លានដុល្លារ, និងមីយ៉ាន់ម៉ា ០.៣៧ លានដុល្លារ។
សូមបញ្ជាក់ថា ទំនិញដែលកម្ពុជាបាននាំចេញទៅទីផ្សារអន្តរជាតិមានជា កង់ សំបកកង់ ផលិតផលបន្ទះសូឡា ជ្រូករស់ សម្លៀកបំពាក់ ស្បែកជើង កាបូបធ្វើដំណើរ និង អង្ករ ស្វាយចន្ទី។ល។
