ប្រាក់ចំណេញក្រុមហ៊ុនឧស្សាហកម្មរបស់ប្រទេសចិនបានកើនឡើង ជាសញ្ញាណមួយនៃសេដ្ឋកិច្ចដែលកំពុងស្ទុះងើបឡើងវិញ

សារព័ត៌មាន Reuters បានចុះផ្សាយថា ក្រុមហ៊ុនឧស្សាហកម្មរបស់ប្រទេសចិន បានប្រកាសពីប្រាក់ចំណេញសរុបរបស់ខ្លួននៅអំឡុងខែមករា ដល់ខែកុម្ភៈ ខណៈដែលវាជាសញ្ញាណមួយនៃសេដ្ឋកិច្ចដែលកំពុងស្ទុះងើបឡើងវិញ បើទោះបីជាវិស័យអចលនទ្រព្យកំពុងដាំក្បាលចុះខ្លាំងក៏ដោយ។

ការិយាល័យស្ថិតិជាតិ (NBS) នៅថ្ងៃទី២៧ ខែមីនា ២០២៤ បានបង្ហាញថា នៅរយៈពេលពីរខែដំបូងឆ្នាំថ្មីនេះ ប្រាក់ចំណេញក្រុមហ៊ុនឧស្សាហកម្មរបស់ប្រទេសចិនបានកើនឡើង១០,២% បើធៀបនឹងរយៈពេលដូចគ្នាកាលពីឆ្នាំមុន ខុសប្លែកពីប្រាក់ចំណេញពេញមួយឆ្នាំ២០២៣ ដែលធ្លាក់ចុះចំនួន២,៣%។ លើសពីនោះ ក្រុមហ៊ុនដែលស្ថិតក្រោមការគ្រប់គ្រងដោយរដ្ឋចិន ក៏មានការកើនឡើងប្រាក់ចំណូល០,៥% ខណៈដែលក្រុមហ៊ុនបរទេសមានការកើនឡើង៣១,២% ចំណែកឯក្រុមហ៊ុនឯកជនវិញក៏មានការកើនឡើងដល់ទៅ១២,៧% ផងដែរ។

សូមរម្លឹកថា ក្រុមហ៊ុនឧស្សាហកម្មនៅក្នុងប្រទេសចិនណា ដែលមានប្រាក់ចំណូលអាជីវកម្មយ៉ាងហោចណាស់ ២០លានយន់ (ប្រហែល ២,៨២លានដុល្លារអាមេរិក) ប្រចាំឆ្នាំនោះ បានមើលឃើញនូវប្រាក់ចំណេញរួមគ្នារបស់ពួកគេរហូតដល់ទៅ ៩១៤,០៦ពាន់លានយន់ នារយៈពេលត្រឹមពីរខែដំបូងឆ្នាំថ្មីនេះប៉ុណ្ណោះ៕