ក្រុមហ៊ុន LG Energy Solution (LGES) និងក្រុមហ៊ុន Hyundai Motor Group របស់កូរ៉េខាងត្បូងបានបោះទុនប្រមាណ ៤,៣ពាន់លានដុល្លារចាប់ផ្តើមសាងសង់រោងចក្រផលិតអាគុយរថយន្តអគ្គិសនីនៅក្នុងទឹកដីសហរដ្ឋអាម៉េរិក។ នេះបើតាមការចុះផ្សាយពីសារព័ត៌មាន CNA។
ក្រុមហ៊ុន Hyudai និង LGES រំពឹងទុកថា ការសាងសង់រោងកចក្រថ្មីរបស់ខ្លួន នៅក្នុងរដ្ឋGeorgia នឹងចាប់ផ្តើមនៅឆមាសទីពីរនៃឆ្នាំ ២០២៣ជាមួយនឹងការចាប់ផ្តើមផលិតអាគុយលើកដំបូង នៅចុងឆ្នាំ ២០២៥។ រោងចក្រថ្មីនេះសមត្ថភាពផលិតប្រចាំឆ្នាំ ៣០ជីហ្គាវ៉ាត់ម៉ោង(GWh) ពោលគឺគ្រប់គ្រាន់សម្រាប់ផលិតអាគុយរហូតដល់ទៅ ៣០០ ០០០ ក្នុងមួយឆ្នាំៗ។
គួររម្លឹកថា LGES និង Hyundai Motor Group ដែលមានក្រុមហ៊ុនបុត្រសម្ព័ន្ធផ្សេងទៀតដូចជា Hyundai Motor, Kia និងក្រុមហ៊ុនផលិតគ្រឿងបន្លាស់រថយន្ត Hyundai Mobis នឹងកាន់កាប់ភាគហ៊ុន ម្នាក់ ៥០% សម្រាប់ការបណ្តាក់ទុនរួមគ្នាទៅលើរោងចក្រថ្មីនេះ។
នាយកប្រតិបត្តិក្រុមហ៊ុន LGES លោក Youngsoo Kwon បាននិយាយថា ក្រុមហ៊ុនខ្លាំងពីរនៅក្នុងឧស្សាហកម្មរថយន្ត និងអាគុយ បានចាប់ដៃរួមគ្នាហើយ ដូច្នេះអាចបញ្ជាក់បានថា យើងនឹងត្រៀមខ្លួនរួចជាស្រេច ដើម្បីជំរុញដល់ការផ្លាស់ប្តូរវិស័យ EV នៅក្នុងទឹកដីសហរដ្ឋអាមេរិក៕
