អ្នកនឹងមិនងាយបានឃើញសត្វក្រសាធ្នង់ ព្រោះជាបក្សីដែលមានភាពអៀនខ្មាសច្រើន ដោយវាចំណាយពេលតិចតួចនៅទីវាល និងជាប្រភេទជិតផុតពូជ។
សត្វក្រសាធ្នង់ចូលចិត្តរស់នៅកន្លែងដាំដំណាំក្រាស់ៗ ក្បែរទឹកហើយកម្រទុំនៅលើដើមឈើណាស់ដោយវាចូលចិត្តកន្លែងនៅលើដីដើម្បីសម្រាក។ ចំនួនសត្វប្រភេទនេះគេមិនទាន់ដឹងមានចំនួនប៉ុន្មានទេនៅក្នុងប្រទេសកម្ពុជា។
សូមបញ្ជាក់ថា បក្សីនេះមានក្បាលពណ៌ខ្មៅ និងបន្តដោយកំប៉ោយវែង កវែងមានពណ៌ទឹកក្រូច និងមានឆ្នូតខ្មៅចាប់ពីគល់ចំពុះតាមបណ្ដោយករហូតដល់ទ្រូង។ លក្ខណៈពិសេសម្រាមជើងវែងៗរបស់វាអាចដើរបានលើរុក្ខជាតិបណ្តែតទឹក ហើយពេលខ្លះវាដើរលើគុម្ពោតព្រៃ ដោយពុំចាំបាច់ក្តាប់មែកឈើទៀតផង៕