នគរបាលក្រុងបាងកក សង្កាត់១ លោក អដ្ឋាផន វង្សសិរិព្រីដា(Arthaphorn Wongsiripreeda) បានប្រាប់អ្នកសារព័ត៌មានថា ខ្មាន់កាំភ្លើងជនជាតិថៃ ឈ្មោះ អេកាឡាក់ ផែណយ (Ekalak Paenoi) បានសារភាពថា រូបគេបានទទួលសំណើរឱ្យបាញ់សម្លាប់លោក លិម គិមយ៉ា អតីតតំណាងរាស្ត្រគណបក្សសង្គ្រោះជាតិពីជនជាតិថៃម្នាក់ដែលជាអ្នកមានគុណបំណាច់លើរូបលោក កាលពីលោកត្រូវបានបណ្ដេញចេញពីក្របខ័ណ្ឌទាហានដំបូង។
លោក អដ្ឋាផន បន្តថា ដំបូងឡើយខ្មាន់កាំភ្លើងមិនទទួលភារកិច្ចនេះទេ ប៉ុន្តែអ្នកបញ្ជានោះ បានបង្ខំរូបគេជាច្រើនដង ទើបព្រមទទួលភារកិច្ចនេះក្នុងតម្លៃឈ្នួលចំនួន ៦ម៉ឺនបាត ឬជាង ១ពាន់ ៧រយដុល្លារ ដោយខ្មាន់កាំភ្លើងប្រាប់ថា រូបគេទទួលភារកិច្ចនេះ គឺចង់តបស្នងសងគុណចំពោះអ្នកបញ្ជា។
ជនដៃដល់រូបនេះថា ក្នុងប្រតិបត្តិការបាញ់សម្លាប់លោក លិម គិមយ៉ា គឺមានអ្នករៀបចំគម្រោងជាប្រព័ន្ធ ដោយមានជនជាតិខ្មែរ ប្រើឈ្មោះជាភាសាថៃថា ស៊ុមវ៉ាំង បាំរុងគីត (Sumvang Bamrongkit) ជាអ្នកផ្ទេរប្រាក់ឈ្នួលនៅមុនកើតហេតុចំនួន ៣ម៉ឺនបាត ឬជាង ៩រយដុល្លារ និងសម្រេចភារកិច្ចទើបទទួលបានចំនួន ៣ម៉ឺនបាត។ ចំពោះប្រតិបត្តិការសម្លាប់នេះរូបគេបានទទួលសារនៅលើបណ្ដាញទំនាក់ទំនងឡាញ(Line) ដែលមានអ្នកប្រាប់ពីអត្តសញ្ញាណលោក លិម គិមយ៉ា ពេលវេលា និងទីតាំងចំណតរថយន្ត។
ក្រោយពេលបាញ់សម្លាប់លោក លិម គិមយ៉ា រួច ខ្មាន់កាំភ្លើងបានរត់គេចខ្លួន តាមការចង្អុលបង្ហាញរបស់បណ្ដាញអ្នកបញ្ជាឱ្យសម្លាប់ ដោយប្រើប្រាស់តាមជំហាន និងឧបាយកលដើម្បីបោកបញ្ឆោតមន្ត្រីស៊ើបអង្កេត រហូតពួកគេបាននាំលោកទៅដល់ព្រំដែន ស្រុកខៅដិន (Khao Din) ខេត្តស្រះកែវ (SaKeo) មានយុវជនចំនួន ២នាក់ជាជនជាតិខ្មែរ ចាំទទួលលោក និងដឹកតាមម៉ូតូចុះតាមច្រកស្រុកសំពៅលូន ខេត្តបាត់ដំបង។
បច្ចុប្បន្នសមត្ថកិច្ចបានស្នើសុំដីកាឃុំខ្លួនខ្មាន់កាំភ្លើងពីតុលាការព្រហ្មទណ្ឌនៅថ្ងៃទី១៣ ខែមករា ដើម្បីបន្តនីតិវិធីទៀត៕
