រដ្ឋមន្ត្រីការពារជាតិថៃ សំណើនាយករដ្ឋមន្រ្តីមិនអាចធានា១០០ភាគរយការទប់ស្កាត់ធ្វើរដ្ឋប្រហារ

សារព័ត៌មាន Bangkok Post បានផ្សាយថា រដ្ឋមន្ត្រីក្រសួងការពារជាតិប្រទេសថៃ លោក Sutin Klungsang កាលពីថ្ងៃពុធបានបង្ហាញពីទំនុកចិត្តលើសំណើដែលអនុញ្ញាតឱ្យនាយករដ្ឋមន្ត្រីព្យួរតំណែងមន្ត្រីកំពូលៗណាដែលត្រូវបានគេសង្ស័យបានរៀបចំរដ្ឋប្រហារយោធា ដោយលោកនិយាយថា វាអាចជាការរារាំងដ៏មានសក្តានុពលប្រឆាំងនឹងអន្តរាគមន៍យោធា។

លោក Sutin បានទទួលស្គាល់ថា ខណៈដែលសំណើនេះប្រហែលជាមិនធានា ១០០ភាគរយ ចំពោះការទប់ស្កាត់ការធ្វើរដ្ឋប្រហារនោះទេ តែវាអាចកាត់បន្ថយយ៉ាងខ្លាំងនូវលទ្ធភាពនៃព្រឹត្តិការណ៍បែបនេះដែលកើតឡើងដែលលោកចាត់ទុកថាជាការអភិវឌ្ឍន៍វិជ្ជមាន។

ក្រោមសំណើនេះនាយករដ្ឋមន្ត្រីដោយមានការយល់ព្រមជាមុនពីខុទ្ទកាល័យគណៈរដ្ឋមន្ត្រីត្រូវបានអនុញ្ញាតឱ្យព្យួរការងារជាបន្ទាន់ពីមន្ត្រីជាន់ខ្ពស់ដែលគ្រោងនឹងដណ្តើមអំណាច និងផ្តួលរំលំរដ្ឋាភិបាល។ សំណើនេះទើបទទួលបានការអនុម័តពីកិច្ចប្រជុំក្រុមប្រឹក្សាការពារជាតិដែលដឹកនាំដោយលោក Sutin ។ វាទាមទារឱ្យមានការផ្លាស់ប្តូរច្បាប់ គ្រប់គ្រងមុខងាររដ្ឋបាល របស់ក្រសួងការពារជាតិផងដែរ។

សូមរម្លឹកថា ប្រទេសថៃបានធ្វើរដ្ឋប្រហារ ដោយជោគជ័យចំនួន ១២លើក ហើយនៅពេលសួរថាតើលក្ខណៈវិនិច្ឆ័យណា ដែលនាយករដ្ឋមន្ត្រីនឹងប្រើដើម្បីកំណត់ថាតើហានិភ័យ នៃរដ្ឋប្រហារជិតមកដល់នោះ លោក Sutin បាននិយាយថា ហានិភ័យអាចត្រូវបានវាយតម្លៃដោយផ្អែកលើចលនា និងសកម្មភាពជាក់លាក់ នៅក្នុងជួរយោធា៕